Aqmola oblysynda birqatar vedomstvo bólingen qarjyny ıgere almaýy múmkin

ASTANA. KAZINFORM – Negizgi sebep — respýblıkalyq bıýdjetten qarajattyń ýaqtyly túspeýi, dep habarlaıdy Kazinform tilshisi.

Bıýdjettiń ıgerilmeýi týraly faktiler oblystyq máslıhattyń ekonomıka jáne bıýdjet máseleleri jónindegi turaqty komıssııasynyń otyrysynda aıtyldy.

Aqmola oblysy qarjy basqarmasy basshysynyń orynbasary Farıza Baımanovanyń aıtýynsha, josparlanǵan túsimderdiń oryndalmaýynyń basty sebebi respýblıkalyq bıýdjetten qarajattyń ýaqytyly ári tolyq bólinbeýi.

Máselen, 1 qyrkúıekke deıin respýblıkalyq bıýdjetten 23,4 mlrd teńge túspegen, onyń 15 mlrd teńgesi — sýbventsııalar. Jyldyq sýbventsııa kólemin Qarjy mınıstrligi mamyr aıynda qysqartqan.

— Eger Qarjy mınıstrligi jyl sońyna deıin sýbventsııa kólemin qalpyna keltirmese, onda jeltoqsanda qarjy tapshylyǵyna baılanysty áleýmettik mindettemeler — jalaqy, stıpendııa, tamaqtandyrý jáne dári-dármekpen qamtý tolyq kólemde oryndalmaıdy. Bul óz kezeginde bıýdjettik uıym qyzmetkerleri men halyq arasynda áleýmettik shıelenis týdyrady. Sondyqtan bıýdjet komıssııasynyń otyrysynda josparlanǵan is-sharalardy qarjylandyrý úshin qosymsha kózderdi tartý nemese shyǵyndardy ońtaılandyrý máselesin qarastyrý qajet dep sanaımyz, — dedi Farıza Baımanova.

Jalpy óńirde 463,6 mlrd teńge ıgerildi, bul kezeńdik jospardyń 96%-yn jáne jyldyq jospardyń 60%-y bolyp otyr.

— Oblys boıynsha 20,5 mlrd teńge ıgerilmeı qaldy. Onyń ishinde aýdandyq jáne qalalyq bıýdjet — 16,6 mlrd teńge, oblystyq basqarmalar — 10,3 mlrd teńge. Negizgi sebep — respýblıkalyq bıýdjetten transfertterdiń ýaqtyly aýdarylmaýy. 1 qyrkúıekke deıin respýblıkalyq bıýdjetten 6,4 mlrd teńge transfert túspegen, — dedi ol.

Osynyń saldarynan tórt oblystyq vedomstvo josparlanǵan is-sharalardy tolyq kólemde iske asyra almady.

Jolaýshylar kóligi jáne avtomobıl joldary basqarmasy nebári 92,2% ǵana ıgergen.
Igerilmegen 3,5 mlrd teńge — Ulttyq ekonomıka mınıstrliginen kelmegen qarjy. Bul qarajat qala shetterin, mono jáne shaǵyn qalalardy damytý baǵdarlamasy, «Aýyl — El besigi» jobasy aıasynda jol salý jáne jóndeýge arnalǵan alty jobaǵa baǵyttalǵan bolatyn.

Aýyl sharýashylyǵy basqarmasy 2 mlrd teńgeni ıgermedi. Sebebi aýyl halqynyń tabysyn arttyrý jobasyn keńeıtýge arnalǵan nesıe Aýyl sharýashylyǵy mınıstrliginen túspegen.

Qurylys, sáýlet jáne qala qurylysy basqarmasy 1 mlrd teńgeni ıgermedi. Bul qarajat Ulttyq ekonomıka mınıstrliginen «Aýyl — El besigi» baǵdarlamasy boıynsha mádenıet nysandaryn salýǵa arnalǵan.

Energetıka jáne turǵyn úı-kommýnaldyq sharýashylyq basqarmasy 1,9 mlrd teńgeni ıgermedi. Onyń ishinde 1 mlrd teńge — Indýstrııa jáne qurylys mınıstrliginen sýmen jabdyqtaý jáne sý burý júıesin damytýǵa, 853 mln teńge — Ulttyq ekonomıka mınıstrliginen «Aýyl — El besigi» jobasyna arnalǵan.

Oblys deńgeıinde 10 qyrkúıektegi jaǵdaı boıynsha eń tómen ıgerý kórsetkishi tótenshe jaǵdaılar departamentinde, bar bolǵany 22,1% (443,7 mln teńge ıgerilmegen).

— Iá, bizde 22,1% ıgerilmeı qaldy, biraq búgin (10.09.2025) mınıstrlikten lızıngtik qarjylandyrý tólemine ruqsat aldyq. Apta sońyna deıin 283 mln 829 myń teńge jetkizýshige aýdarylady. Qalǵany — arnaıy jabdyqtardy jetkizý. Qyrkúıek sońyna deıin kelýi tıis. Qazanǵa deıin tolyq oryndap shyǵamyz dep oılaımyn, — dedi óńirlik TJD ókili.

Tsıfrlandyrý jáne arhıvter basqarmasy qarajattyń nebári 68,3%-yn ǵana ıgergen.
Igerilmegen soma — 768,7 mln teńge, onyń ishinde:

215,5 mln teńge — ınternet qyzmetterine konkýrstyq rásimderdiń uzaqtyǵyna baılanysty,

980,3 myń teńge — kondıtsıoner jetkizilmegendikten kelisimshart buzylǵan,

131,5 myń teńge — taýar jetkizilmegendikten ıgerilmegen.

Basqarma ókiliniń aıtýynsha, 300 mln teńge óńirdi basqarý ortalyǵyn qurýǵa avans retinde josparlanǵan. Biraq jetkizýshi avans qajet emes dep kelisim jasaǵan. Qyrkúıekte barlyq soma — shamamen 700 mln teńge ıgeriledi dep josparlanyp otyr. Sonymen qatar, ótken jyly da vedomstvo osylaı qarajatty ıgermeı, aqyry bıýdjetke qaıtarǵany eske salyndy.

Aýdandar deńgeıinde qarajattyń 91,5%-y ıgerilgen. 16,6 mlrd teńge ıgerilmegen, onyń ishinde 9,3 mlrd teńge — respýblıkalyq transfertter. Eń joǵary kórsetkishke Jarqaıyń jáne Sandyqtaý aýdandary jetti.

Al eń kóp ıgerilmegen qarajat Tselınograd, Atbasar, Arshaly, Bulandy, Býrabaı aýdandarynda jáne Qosshy, Kókshetaý qalalarynda baıqalady.

— Respýblıkalyq transfertter boıynsha ıgerilmegen soma — 9,3 mlrd teńge, oblystyq transfertter — 5,7 mlrd teńge, al menshikti kiris — 1,6 mlrd teńge. Eger respýblıkalyq transfertterdiń ıgerilmeý sebebi qarajattyń ýaqytyly túspeýi bolsa, oblystyq transfertter óńirlerge ýaqtyly baǵyttalǵan. Soǵan qaramastan, 5,7 mlrd teńge ıgerilmeı qaldy. Onyń ishinde eń úlken soma — 2,7 mlrd teńge Tselınograd aýdanynda. Bul jerde 13 aýyldaǵy ishki joldardy kúrdeli jóndeý, sý júıesin rekonstrýktsııalaý, gaz qubyryn tartý jumystary oryndalmaǵan. Qosshy qalasynda da 1,3 mlrd teńge ıgerilmeı qaldy, 10 joba boıynsha jumys tolyq aıaqtalmaǵan, — dep tolyqtyrdy Farıza Baımanova.

Aıta ketelik Memleket basshysy Aqmola oblysyna jumys saparymen barǵan edi.