Aqmola oblysynda bir jylda 1 630 adam qandas mártebesin alǵan
KÓKShETAÝ. KAZINFORM — Aqmola oblysynda ótken jyly 688 otbasyna nemese 1630 adamǵa qandas mártebesi berildi.
Aqmola oblysy jumyspen qamtý jáne áleýmettik baǵdarlamalardy úılestirý basqarmasynyń málimetinshe, Táýelsizdik alǵannan beri Aqmola oblysyna 30 myńnan astam qandas qonys aýdarǵan.
Byltyrǵy jyly 1591 adam, 645 otbasy kelgen. Onyń basym kópshiligi — Mońǵolııa, Túrikmenstan, Reseı, Ózbekstan, Qytaıdan atajurtqa qonys aýdarǵandar.
«Oblysymyzǵa kelgen qandastar Tselınograd, Astrahan, Shortandy aýdandary men Kókshetaý, Qosshy, Stepnogor qalalarynda turyp jatyr. Olar jalpy personal jáne qurylys salasynda jumys isteıdi. Jumys berýshi shyǵystarynyń bir bóligi turǵyn úı qunynyń 50 paıyz mólsherinde óteledi, biraq qonys aýdarýshynyń nemese qandastyń otbasyna turǵyn úı berý úshin 1 160 aılyq eseptik kórsetkish mólsherinen aspaıdy. Kóshýge arnalǵan shyǵystardy óteý bir mezgilde otaǵasyna jáne árbir múshesine 70 aılyq eseptik kórsetkish mólsherinde júzege asyrylady. Turǵyn úıdi jaldaý jáne kommýnaldyq qyzmetterdi tóleý úı satyp alǵanǵa deıin aı saıyn, biraq on eki aıdan aspaıtyn merzimde usynylady», — dedi vedomstvodan.
Búgingi kúni olardyń birazy jergilikti memleket kómeginiń arqasynda jeke kásibin dóńgeletip otyr.
Jastardyń arasynda Qazaqstanda bilim alyp, jumys istep jatqandar bar.
Sonyń biri — Mońǵolııanyń qazaqtar qonystanǵan Baıan-Ólgeı aımaǵynan kelgen qandasymyz Muhamed Tileýbaı.
«Men tarıhı otanyma 2018 jyly keldim. Bastapqyda árıne, qıyndyqtar boldy, jumys, oqý degen sııaqty. Osynda aǵam turǵandyqtan baspana jaǵynan qıyndyq bolmady. Alǵashynda Astanada qurylysta jumys istedim. Keıin arada bir jyl ótken soń Óskemendegi Sársen Amanjolov atyndaǵy Shyǵys Qazaqstan ýnıversıtetine grantqa oqýǵa tústim. 2023 jyldan bastap Kókshetaýda jergilikti gazette jýrnalıst retinde jumys istep kelemin. Jalpy, aıtarym Qazaqstanda qandastarǵa memleket tarapynan barlyq jaǵdaı jasalǵan, azamattyq alýda kedergi joq. Tek mártebe alý qıyn, ol úshin shalǵaı aýyldarǵa barý kerek, kóptegen qandastar qala mańynda qalǵysy keledi. Sol jaǵynan alǵanda qıyndyq bar», — deıdi Muhamed Tileýbaı.
Aıtýynsha, Qazaqstan men Mońǵolııany salystyrǵanda tarıhı otanymyzda jumys isteıtin jastarǵa múmkindik kóp.
Bos jumys oryndary da jetkilikti, túrli memlekettik baǵdarlamalar qarastyrylǵan.
Osy rette «Jumyspen qamtý» tárizdi memlekettik baǵdarlamar aqmolalyqtardy eńbekke tartyp, óz isin bastaýǵa nemese qaıta daıarlyq kýrsynan ótip, túrli kásiporyndar men mekemelerde suranysqa ıe mamandyqtar boıynsha jumysqa ornalasýǵa edáýir septigin tıgizýde.
Aıta ketsek, budan buryn búrkitshi Aısholpannyń otbasy Qazaqstanǵa kóship kelgenin jazǵan edik.
