Aqmola oblysynda bir táýlikte úsh birdeı jol apaty bolyp, alty adam qaza tapty
ASTANA.KAZINFORM – 18 qarashada Aqmola oblysynyń tasjoldarynda úsh birdeı jol-kólik oqıǵasy bolyp, saldarynan alty adam kóz jumdy. Bul týraly Aqmola oblysy polıtsııa departamentiniń baspasóz qyzmeti habarlady.
Vedomstvo málimetinshe, alǵashqy jol apaty «Jezqazǵan – Arqalyq – Petropavl» avtojolynyń 412-shaqyrymynda Renault Sandero jáne VAZ-2106 kólikteriniń qatysýymen bolǵan.
– Jol-kólik oqıǵasy saldarynan VAZ -2106 avtokóliginiń júrgizýshisi men eki jolaýshysy oqıǵa ornynda kóz jumdy. Renault Sandero kóliginiń júrgizýshisi túrli dene jaraqattarymen medıtsınalyq mekemege jetkizildi. Qazirgi ýaqytta sotqa deıingi tergep-tekserý amaldary júrgizilip jatyr. Onyń nátıjesi boıynsha protsessýaldyq sheshim qabyldanady, – dep habarlady vedomstvo ókilderi.
Ekinshi jol apaty «Astana – Atbasar – Jaqsy» avtojolynyń 252-shaqyrymynda tirkelgen. Hyundai Accent kóliginiń júrgizýshisi joldy belgilenbegen jerden kesip ótpek bolǵan jaıaý júrginshini qaǵyp ketken. Saldarynan jaıaý júrginshi alǵan jaraqattarynan oqıǵa ornynda kóz jumdy. Atalǵan derek boıynsha da polıtseıler tergeý jumystaryn bastady.
Al úshinshi jol apaty «Arshaly – Ereımentaý – Pavlovka» avtojolynyń 19-shaqyrymynda, Taıbaı aýylynyń mańynda bolǵan. Honda Odyssey kóliginiń júrgizýshisi rýlge ıe bola almaı, kólikti aýdaryp alǵan.
– Jol-kólik oqıǵasy saldarynan avtokóliktiń eki áıel jolaýshysy oqıǵa ornynda kóz jumdy. Júrgizýshi men eki jolaýshy túrli dene jaraqattarymen medıtsınalyq mekemege jetkizildi. Qazirgi ýaqytta sotqa deıingi tergep-tekserý amaldary júrgizilip jatyr. Onyń nátıjesi boıynsha protsessýaldyq sheshim qabyldanady, – dep tolyqtyrdy polıtsııa ókilderi.
Óńir polıtseıleri júrgizýshilerdi jol qozǵalysy erejelerin qatań saqtaýǵa, jyldamdyq rejıminen asyrmaýǵa jáne jolda barynsha muqııat bolýǵa shaqyrdy.
Aıta keteıik, Almatyda órt sóndirý kóligi jol apatyna ushyrap, bir adam qaıtys boldy.