Aqmola oblysynda bir otbasy túgeldeı sýǵa batyp ketti

ASTANA. KAZINFORM – Aqmola oblysynda túgel bir otbasynyń ajaly sýdan keldi. Bul týraly Tótenshe jaǵdaılar mınıstrliginiń baspasóz qyzmeti habarlaıdy.

Mınıstrliktiń málimetinshe, 4 adamnyń ómirin qıǵan qaıǵyly oqıǵa Arshaly aýdany Arnasaı aýylynan 2 shaqyrym jerdegi Astana sý qoımasynda bolǵan. 

«Tórteýi de bir otbasynyń músheleri. 1980 jyly týǵan áıel men 2001 jyly týǵan qyzdyń denelerin kýágerler tapty. 1977 jáne 2000 jyly týǵan eki er adamnyń denesin Aqmola oblysy jáne Astana qalasynyń TJD qutqarýshylary izdep jatyr», - delingen habarlamada. 

Sondaı-aq, vedomstvodan otbasy músheleriniń shomylýǵa tyıym salynǵan jerde sýǵa ketkeni aıtyldy. 

Osy oraıda Aqmola oblysynyń TJD azamattardy sýdaǵy qaýipsizdik sharalaryn saqtaýǵa shaqyrady.