Aqmola oblysynda bir kúnde eki qazandyq jaryldy

KÓKShETAÝ. KAZINFORM — Aqmola oblysy Arshaly aýdanynda bir kúnde eki jarylys boldy. Jarylystan zardap shekken adam bar.

Arshaly aýdany ákimdiginiń habarlaýynsha, 10 qazan kúni Jibek joly aýylynda jer úıge japsarlas salynǵan aýmaǵy 10 sharshy metr pesh úı jaryldy. Oqıǵa saldarynan nysannyń qabyrǵalary jarym-jartylaı qıraǵan, alaıda órt shyqpaǵan.

— Jarylystan 1974 jylǵy azamat zardap shekti. Ol dereý Astana qalasynyń №1 kópbeıindi oblystyq aýrýhanasyna jetkizilip, medıtsınalyq kómek kórsetildi. Japa shegýshige «bas terisiniń zaqymdalýy, mıdyń jabyq jaraqaty» dıagnozy qoıylǵan. Medıtsınalyq tekserýden keıin ol úıden em alýǵa bosatyldy, — dep habarlady ákimdik.

Ekinshi qazandyqtyń jarylysy osy aýyldaǵy «QazArt» JShS-de bolǵan. Zardap shekkender joq.

— Jarylys bolǵan jerge dereý Arshaly aýdany Tótenshe jaǵdaılar bólimi jeke quramynan eki adam, bir tehnıka jáne Jibek Joly aýylynyń qutqarýshy bóliminen úsh adam jiberildi. Qazirgi ýaqytta oqıǵanyń mán-jaıyn anyqtaý úshin jedel tergeý sharalary júrip jatyr, — dep túsindirdi vedomstvodan.

Ákimdiktiń málimetinshe, qazir onda TJ bóliminiń qyzmetkerleri men Arshaly aýdanynyń polıtsııasy qyzmet etip jatyr. Jaǵdaı atqarýshy organdardyń baqylaýynda tur.

Aıta keteıik, buǵan deıin Túrkistan oblysyndaǵy kóppáterli turǵyn úılerdiń birinde gaz jarylysy bolǵanyn jazǵan edik.

 

Kamıla Múlik