Aqmola oblysynda bir kúnde eki adam qaza tapty
ASTANA. KAZINFORM — Aqmola oblysynyń Zerendi jáne Tselınograd aýdandarynda eki adam kóz jumdy. Qazir eki oqıǵa boıynsha sotqa deıingi tergeý amaldary júrgizilip jatyr.
Aqmola oblystyq Polıtsııa departamenti baspasóz qyzmetiniń málimetinshe, qaıǵyly oqıǵalar óńirdiń eki aýdanynda tirkelgen.
— Aldyn ala málimet boıynsha Zerendi aýdanynda dala jumystaryn júrgizý kezinde Elenovka aýylynyń 46 jastaǵy turǵyny qaıtys bolǵan. Al Tselınograd aýdanynda Túrkistan oblysynyń 22 jastaǵy turǵyny elektr togynyń soǵýynan qaza tapty, — dep habarlady vedomstvo.
Qazir polıtsııa qyzmetkerleri oqıǵanyń barlyq mán-jaıyn anyqtaý úshin qajetti tergeý áreketterin júrgizip jatyr. Tergeý nátıjesinde zańnamaǵa sáıkes tıisti protsessýaldyq sheshimder qabyldanady.
Belgili bolǵandaı, Zerendi aýdanynda kóz jumǵan er adam shóp taılaıtyn prestiń mehanızmine qysylyp qalǵan.
Aıta keteıik, Shyǵys Qazaqstan oblysynyń kásiporyndarynda jyl basynan beri 74 jazataıym oqıǵa tirkelip, sonyń saldarynan 9 adam kóz jumdy.
