Aqmola oblysynda boranda adasyp qalǵan úsh adam qutqaryldy
Zerendi aýdanynda boranda adasyp qalǵan Aqkól aýylynyń úsh turǵyny tabyldy, dep habarlaıdy Kazinform.
Aqmola oblystyq PD baspasóz qyzmetiniń málimetinshe, úsh áıel mal baǵýǵa shyqqan. Boranda qalǵan olardy týystary men aýyldastary izdeýge shyqqan. Alaıda aqtútek boranda izdeý sharalarynan túk shyqpaǵan. Keıin polıtsııadan kómek surap, ótinish jasaǵan.
«Polıtsııa qyzmetkerleri arnaıy qyzmettik kóliktiń kómegimen birneshe saǵattyń ishinde joǵalǵan úsh adamdy Ivanovka aýyly mańynan tapty. Belgili bolǵandaı, olar borannan adasyp, aýyldan 10 shaqyrym qashyqtyqqa alystap ketken. Qazirgi kezde úsh áıel de úılerine jetkizildi», - dedi vedomstvodan.
Aıta ketsek, budan buryn Aqmola oblysynda dúleı jelden ǵımarattardyń shatyry ushyp, eldimekender jaryqsyz qalǵanyn jazǵan edik.
