Aqmola oblysynda bilim bóliminiń 4 qyzmetkeri jaýapqa tartyldy
ASTANA. KAZINFORM - Sandyqtaý aýdanynyń prokýratýrasy balabaqsha tárbıelenýshileriniń quqyǵyn qorǵady. Bul týraly Aqmola oblysynyń prokýratýrasy málimdedi.
Kámeletke tolmaǵandar quqyǵynyń qorǵalýyn taldaý barysynda 78 mektepke deıingi uıym tárbıelenýshisine azyq-túlik úshin ótemaqy tólenbegeni anyqtalǵan.
Aqmola oblysy ákimdiginiń qaýlysyna sáıkes, azamattardyń jekelegen sanatyndaǵy azyq-túlik shyǵyndary memleket esebinen óteledi. Azamattardyń bul sanattaryna kópbalaly otbasylar, AÁK-ge muqtaj otbasylar jáne halyqtyń osal toptaryna jatatyn basqa da adamdar jatady.
Al aýdandyq bilim bólimi kópbalaly analar men halyqtyń áleýmettik osal toptaryna jatatyn otbasylardy azyq-túlikke ótemaqy tóleý tizimine engizbegen. Osylaısha, olardyń mektepke deıingi uıymdardan tegin tamaq alý quqyǵyn buzǵan.
Prokýrorlardyń aralasýymen balabaqshalardaǵy 78 balaǵa azyq-túlik shyǵyndary óteldi. Buzýshylyqtar úshin bilim bóliminiń 4 qyzmetkeri tártiptik jaýapkershilikke tartyldy.
