Aqmola oblysynda bıyl jańǵyrtylǵan taǵy úsh vokzal el ıgiligine berildi
ASTANA. KAZINFORM — Aqmola oblysynda taǵy úsh jańǵyrtylǵan temirjol vokzaly paıdalanýǵa berildi. Olar Shortandy kentinde, sondaı-aq Makınsk jáne Aqkól qalalarynda ornalasqan. Bul týraly Kólik mınıstrligi málim etti.
Nysandardy jańǵyrtý Memleket basshysynyń tapsyrmasy boıynsha júzege asyrylyp jatqan temirjol ınfraqurylymyn aýqymdy jańǵyrtý jónindegi memlekettik baǵdarlama aıasynda júrgizildi.
— Baǵdarlamaǵa engizilgen nysandar sany boıynsha óńir kósh bastap tur: qazirgi tańda 16 temirjol vokzaly jańǵyrtylyp jatyr. Jańǵyrtý baǵdarlamasy vokzaldarǵa ekinshi ómir syılap qana qoımaı, eldi mekenderdiń týrızm men bıznesti damytýyna, ınvestıtsııalyq tartymdylyǵyn arttyrýǵa qosymsha múmkindik berdi, — delingen habarlamada.
Jańǵyrtylǵan vokzaldar qaýipsizdik, jaılylyq jáne qoljetimdilik boıynsha zamanaýı talaptarǵa tolyq sáıkes keledi. Qaıta jańǵyrtý barysynda ǵımarattardyń qasbetteri men ishki bólmeleri, ınjenerlik jeliler jańartyldy. Sondaı-aq jaıly kútý zaldary jabdyqtalyp, navıgatsııa júıesi jetildirildi, múmkindigi shekteýli azamattar men balaly jolaýshylar úshin qolaıly jaǵdaı jasaldy.
Eske sala keteıik, óńirde jańǵyrtýdan keıin alǵash bolyp Şýchınsk qalasynyń temirjol vokzaly jumysyn bastady. Shilde aıynda taǵy 7 nysandy paıdalanýǵa berý josparlanyp otyr. Al Kókshetaý qalasyndaǵy temirjol vokzaly qazan aıynda paıdalanýǵa beriledi.
Aıta keteıik, buǵan deıin Qaraǵandy oblysynda jańǵyrtýdan ótken úsh temirjol vokzaly paıdalanýǵa berildi.
