Aqmola oblysynda balyqshynyń qarmaǵyna «tarıhı artefakt» ilindi
ASTANA. KAZINFORM — Aqmola oblysynyń Qorǵaljyn aýdany Sabyndy aýyldyq okrýgi aýmaǵynda, Nura ózenindegi shlıýz mańynda aldyn ala derekter boıynsha mamont súıekteri tabyldy, dep habarlaıdy Kazinform tilshisi.
Qorǵaljyn aýdanynyń ishki saıasat bóliminiń málimetinshe, jergilikti turǵyn Luqman-Hakim Qasymov balyq aýlaý kezinde qarmaǵyna ádetten tys aýyr zat ilingenin baıqaǵan. Ol sýdan shyǵaryp alǵan kezde, onyń iri súıek ekeni, tipti mamonttyń azý tisteri bolýy múmkin ekeni anyqtalǵan.
— Búgin bul biregeı tarıhı artefakt Qorǵaljyn aýdandyq ólketaný mýzeıine tapsyryldy. Jaqyn arada ol arnaıy ǵylymı-zertteý jumystaryna jiberiledi. Bul zertteý tabylǵan súıekterdiń qaı dáýirge jáne qaı janýarǵa tıesili ekenin anyqtaýǵa kómektesedi. Bul oqıǵa óńir tarıhy úshin asa qundy jańalyq boldy. Tabıǵat pen tarıhtyń mundaı tosyn syıy ólkemizdiń baı murasynyń taǵy bir dáleli, — delingen vedomstvo habarlamasynda.
Sonymen qatar, Aqmola oblysy tarıhı-mádenı murany qorǵaý jáne paıdalaný ortalyǵynyń dırektory Jasulan Úkeevtiń pikirinshe, mundaı jaǵdaılar Esil, Jabaı, Nura ózenderiniń boıynda jıi kezdesedi jáne olardy zertteý — paleontologtardyń quzyretinde. Aqmola oblysynda paleontologtar joq bolǵanymen, bul jańalyq basqa óńir mamandarynyń qyzyǵýshylyǵyn týdyrýy múmkin.
Aıta ketelik SQO-da alyp mamonttyń súıegi tabylǵan edi.