Aqmola oblysynda balany shymshyp alǵan tárbıeshi jazaǵa tartyldy

KÓKShETAÝ. KAZINFORM - Aqmola oblysynyń Atbasar aýdanynda balany shymshyp alǵan balabaqsha tárbıeshisi jazaǵa tartyldy.

Atbasar aýdandyq sotynda ótken sot protsesine qalalyq mektepke deıingi bilim berý mekemeleriniń qyzmetkerleri qatysty.

Onda jergilikti balabaqsha tárbıeshisine qatysty ákimshilik quqyq buzýshylyq týraly is boıynsha sottyń qaýlysy jarııalandy.

Sotta belgili bolǵandaı, balabaqsha tárbıeshisi bes jasar balany shymshyp alyp, dene jaraqatyn salǵan jáne densaýlyǵyna jeńil zııan keltirgen (QR Ákimshilik quqyq buzýshylyq týraly kodekstiń 73-1-baby 1-bóligi).

Aıyptalýshynyń kinási moıyndaý aıǵaqtarymen, bala ókilderiniń aryzymen, sarapshynyń kógerý túrindegi balanyń dene jaraqatyn anyqtaǵany týraly qorytyndysymen rastaldy.

Jaza taǵaıyndaý kezinde sot jeńildetetin jaǵdaılardy, ıaǵnı kináni moıyndaý jáne sottalýshynyń eki kámeletke tolmaǵan balasynyń bolýyn eskerdi. Al jas balaǵa qatysty jasaǵan quqyq buzýshylyǵyn aýyrlatatyn jaǵdaı dep tanydy. 

«Kámeletke tolmaǵan jas balalary bolǵandyqtan qamaýǵa alý múmkin emes. Sol sebepti, sottyń qaýlysymen 15 AEK mólsherinde aıyppul túrinde jaza taǵaıyndaldy», - dedi Aqmola oblysy sotynyń baspasóz qyzmetinen.

Sonymen qatar, sot Atbasar aýdandyq bilim bóliminiń basshylyǵyna jeke qaýly shyǵardy. Onda balabaqsha tárbıeshisiniń quqyqbuzýshylyq jasaǵany jáne aldaǵy ýaqytta bilim berý mekemelerinde osyndaıǵa jol bermeý qajettigi nazarǵa alynǵan. 

Aıta ketsek, budan buryn Kókshetaý turǵynynyń 8 jasar ulyn urlamaqshy bolǵanyn jazǵan edik.