Aqmola oblysynda balany mektepke qabyldamaı qoıǵan
KÓKShETAÝ. KAZINFORM — Aqmola oblysynda mektep balany qabyldaýdan zańsyz bas tartqan.
Aqmola oblysy boıynsha memlekettik qyzmet isteri departamenti baspasóz qyzmetiniń málimetinshe, departamentke bastaýysh, negizgi orta, jalpy orta bilim berýdiń jalpy bilim beretin baǵdarlamasy boıynsha oqytý úshin vedomstvolyq baǵynystylyǵyna qaramastan, bilim berý uıymdaryna qujat qabyldaý jáne oqýǵa qabyldaý qyzmetin ala almaǵan azamat júgingen.
Shaǵymdy qaraý barysynda Kókshetaý qalasynyń № 2 mektep-lıtseıi Memlekettik qyzmetter týraly zańnyń 19-1 buza otyryp, mundaı sheshim qabyldaýdyń sebepterin kórsetpeı, qyzmet kórsetýden bas tartqany anyqtaldy.
Mektep ákimshiligi mundaı derektiń oryn alýyn atalǵan memlekettik qyzmet kórsetiletin aqparattyq júıede sebepterdi kórsetý múmkindiginsiz memlekettik qyzmet kórsetýden bas tartý úshin ǵana negiz (normatıvtik quqyqtyq aktilerge silteme) kózdelgenimen túsindirdi.
«Ótinishti qaraý barysynda departamenttiń laýazymdy tulǵalary aryz ıesi men mektep basshylyǵyna tıisti túsindirme berip, nátıjesinde bala mektepke qabyldandy», — dedi vedomstvodan.
Aıta ketsek, bastaýysh bilimniń jalpy oqý baǵdarlamalaryn iske asyratyn bilim mekemeleri daıyndyq deńgeıine qaramastan, bilim berý uıymy qyzmet kórsetetin aýmaqta turatyn barlyq balalardyń qoljetimdiligin qamtamasyz ete otyryp, alty jastaǵy jáne kúntizbelik jylda alty jasqa tolatyn balalardy birinshi synypqa qabyldaıdy.
Qyzmet alýshylardyń quqyǵyn qorǵaý máselesi departamenttiń turaqty baqylaýynda.
Eske salaıyq, Aqmola oblysynda aýdan ákimi men basqarma basshysy qatań sógis alǵan edi.
