Aqmola oblysynda balalar lageri ruqsat qujatynsyz jumys istegen

KÓKShETAÝ. KAZINFORM — Zańsyz jumys istegen balalar lageriniń jumysyn uıymdastyrǵan Astana qalasynyń 40 jastaǵy turǵyny kúdikke ilindi, dep jazdy Kazinform agenttiginiń menshikti tilshisi.

Aqmola oblysy polıtsııa departamentiniń baspasóz qyzmetiniń málimetinshe, Tselınograd aýdanynyń tártip saqshylaryna 2024 jylǵy 31 shilde kúni belgisiz bir aýylda ruqsatsyz balalar lageri jumys istep jatqany týraly habarlama túsken.

— Atalǵan derek boıynsha QR QK 385-babynyń 3-bóligi («Jalǵan qujattar, mórler, shtamptar, blankiler, memlekettik poshta tólemderiniń belgileri, memlekettik nagradalardy qoldan jasaý, daıyndaý nemese ótkizý») boıynsha sotqa deıingi tergep-tekserý bastaldy. Jedel-izdestirý sharalary barysynda polıtsııa qyzmetkerleri boljamdy uıymdastyrýshy — Astana qalasynyń 40 jastaǵy turǵynynyń jeke basyn anyqtady. Onyń bul zańsyz áreketke qatysy anyqtalyp jatyr, — dep habarlady polıtsııa departamenti.

Polıtsııa ókilderi ata-analarǵa taǵy bir márte eskertý jasady:

— Balalardy saýyqtyrý lagerine jibermes buryn mekemeniń tıisti ruqsat qujattarynyń bar ekenine kóz jetkizý qajet. Ata-analar men azamattardan qujatsyz balalar demalysyn uıymdastyrýdy usynatyn kúdikti uıymdar týraly polıtsııaǵa dereý habarlaýdy suraımyz. Mundaı zańsyz lagerler tek zańdy buzyp qana qoımaı, balalardyń ómiri men densaýlyǵyna qaýip tóndiredi, — dedi vedomstvo ókilderi.

Eske sala keteıik, buǵan deıin Qazaqstanda balalar lagerleriniń qalaı tekseriletini týraly habarlanǵan bolatyn.

Qazaqstanda balalar lagerine joldama quny qansha ekenin myna siltemeden oqyńyz.