Aqmola oblysynda Azııa jáne Parazıada oıyndarynyń júldegerleri marapattaldy
Aqmola oblysynda 19-shy Jazǵy Azııa jáne 4-shi Paraazııa oıyndary men basqa da halyqaralyq jarystarǵa qatysýshylarmen kezdesý ótti, dep habarlaıdy Kazinform.
Oblys ákimdigi baspasóz qyzmetiniń málimetinshe, kezdesýde aımaq basshysy Marat Ahmetjanov sportshylardy baıraqty jarysta alǵan nagradalarymen jáne medaldarymen quttyqtady. Óz sózinde ol Memleket basshysynyń buqaralyq sportty jáne sporttyq ınfraqurylymdardy damytýǵa erekshe kóńil bólip otyrǵanyn atap ótti.
— Aqmola oblysynda búkil elimizdegideı buqaralyq sportty damytý baǵytynda halyqtyń qoljetimdiligin arttyrý úshin sport keshenderi men nysandary kóptep salynýda. Bıylǵy jyl óńir úshin jarqyn jáne este qalarlyq sátterge toly boldy. Hanchjoýda ótken Azııa jáne Paraazııa oıyndarynda aqmolalyq sportshylar kásibı sheberlikterin tanytyp, jeńis tuǵyrynan kórindi, — dep atap ótti Marat Ahmetjanov.
Іs-shara barysynda aımaq basshysy joǵary nátıjelerge qol jetkizgen sportshylar men jattyqtyrýshylardy Alǵys hat jáne aqshalaı sertıfıkatpen marapattady.
— Álemdik sport arenalarynda top jaryp, egemen elimizdiń kók týyn jelbiretip kóterý — biz úshin úlken abyroı. Sol sebepti elimizdiń, onyń ishinde Aqmola oblysynyń namysyn qorǵaý úshin bar kúsh-jigerimizdi salýǵa tyrysamyz. Elimizde kásibı sporttyń damýyna memleket tarapynan zor qoldaý kórsetilýde. Halyqaralyq jarystarda qazaqstandyq sportshylardyń jeńis tuǵyrynan kórinýi sonyń aıqyn dáleli. Bizge únemi qoldaý bildirip otyrǵan oblys basshylyǵyna men jankúıerlerimizge shynaıy alyǵysymdy bildiremiz, — dedi bylǵary qolǵap sheberi Karına Ibragımova.
Aıta ketsek, aqmolalyq sportshylar ótken jazǵy halyqaralyq jarystarda Respýblıka quramasynyń qorjynyna laıyqty úles qosty. Karına Ibragımova aımaqtyq boks tarıhynda alǵash ret 2024 jylǵy Olımpıada oıyndaryna qatysýǵa lıtsenzııa aldy. Aıan Beısembaev, Saýd Arabııasyndaǵy Azııa chempıonatynda altyn jáne Azııa oıyndarynyń qola medalin jeńip aldy. Davıd Degtıarev IV Paraazııa oıyndarynyń altynyn enshiledi. Irına Kýznetsova Albanııada áıelder kúresinen álem chempıonatynda qola júldege ıe boldy. Andreı Tıýtın Taılandta ótken Azııa chempıonatynda sadaq atýdan chempıon atandy.
Saltanatty is-shara oblystyń shyǵarmashylyq ujymdarynyń oryndaýyndaǵy kontserti baǵdaralamaǵa ulasty.
Eske sala keteıik, budan buryn aqmolalyq muǵalim respýblıkalyq baıqaýda júldeli ІІ orynǵa ıe bolǵanyn jazǵan edik.
