Aqmola oblysynda aınalymnan 195 kg esirtki tárkilendi

Aqmola oblysynda esirtki bıznesimen kúresý boıynsha «Qarasora-2023» jedel aldyn alý sharasy ótti, dep habarlaıdy Kazinform tilshisi oblystyq PD baspasóz qyzmetine silteme jasap.

Vedomstvonyń málimetinshe, maýsymnyń 1-nen qazannyń 30-y aralyǵyn qamtyǵan aktsııa barysynda oblys aýmaǵynda esirtkige qatysty 120 qylmystyq quqyq buzýshylyq (27 ótkizý, 7 asa iri mólsherde saqtaý, 2 esirtkini nasıhattaý jáne zańsyz jarnamalaý, 1 ósirý jáne 80-nen astam esirtki zattarymen zańsyz jumys isteý derekteri) anyqtaldy.

- Qabyldanǵan sharalardyń nátıjesinde tıym salynǵan 193 kg esirtki zańsyz aınalymnan alyndy, onyń 120 kg astamy marıhýana, 58 kg gashısh jáne 14 kg sıntetıkalyq esirtki zaty. Sonymen birge, Astana men Aqmola oblysynyń aýmaǵyna gashıshti jetkizý men ótkizýdiń 2 arnasy joıyldy. Býrabaı, Shortandy, Ereımentaý jáne Tselınograd aýdandarynda 4 esirtki zerthanasy anyqtaldy, - dedi vedomstvodan.

Osy rette, tártip saqshylary psıhotropty zattardy jasyrýmen aınalysyp júrgenderdiń qatary jasaryp kele jatqandyǵyna alańdaýly.

- Tórt aıdyń ishinde ustalǵan 11 esirtki jasyrýshynyń ekeýi joǵary synyp oqýshylary, - dep tolyqtyrdy vedomstvodan.

Aıta ketsek, budan buryn Aqmola turǵynynyń úıinen 8 kg marıhýana tabylǵanyn jazǵan edik.