Aqmola oblysynda aýyl turǵynynyń baqshasynan 920 túp qarasora tabyldy

ASTANA. KAZINFORM — Aqmola oblysynda «Qarasora — 2025» jedel-aldyn alý is-sharasy aıasynda iri quqyq buzýshylyqtyń joly kesildi. Polıtseıler Jaqsy aýdanynyń bir aýylynda quramynda esirtki zaty bar ósimdikterdiń zańsyz ósirilgenin anyqtady.

Esirtki qylmysyna qarsy is-qımyl basqarmasynyń mamandary aýdandyq polıtsııa bólimimen birlesip júrgizgen jedel-izdestirý jáne tergeý sharalary barysynda 39 jastaǵy aýyl turǵyny úıiniń aýlasynda qarasora ósirip kelgeni belgili boldy.

Polisia.kz-tiń habarlaýynsha, tintý kezinde tártip saqshylary shamamen 500 gramm marıhýana salynǵan paketti taýyp, aıǵaq zat retinde tárkilegen. Budan bólek, úı irgesindegi baqshada quramynda esirtki zaty bar 920-dan astam qarasora butasy anyqtalyp, túgel joıylýǵa jiberildi. 

Atalǵan fakti boıynsha QR Qylmystyq kodeksiniń 300-baby (Quramynda esirtki bar ósimdikterdi zańsyz ósirý) boıynsha qylmystyq is qozǵaldy. Qazirgi ýaqytta qajetti saraptamalar taǵaıyndalyp, tergeý amaldary júrgizilip jatyr. 

Polıtsııa esirtki aınalymynyń kez kelgen túrine qarsy kúresti kúsheıtip, azamattardy zańǵa baǵynýǵa jáne esirtki zattaryna jolamaýǵa shaqyrady. 

Buǵan deıin Túrkistan oblysynda dárilik ósimdik qazǵan sheteldikter ustalǵanyn jazǵan edik.