Aqmola oblysynda aýyl sharýashylyǵyn damytýǵa 374 mlrd teńge bólinip, jańa nesıelik ónimder engizildi
ASTANA. KAZINFORM – Vıtse-premer – ulttyq ekonomıka mınıstri Serik Jumanǵarın Qosshy qalasynda Aqmola oblysynyń fermerlerimen kezdesti. Bul týraly Úkimettiń baspasóz qyzmeti habarlady.
Aqmola oblysy – elimizdiń jetekshi agrarlyq óńiriniń biri. Óńir ónimindegi aýyl sharýashylyǵynyń úlesi – shamamen 15%. 2025 jyly munda rekordtyq astyq ónimi jınaldy – 7,6 mln tonna. Bul respýblıkalyq kólemniń tórtten birinen asady.
Óńir sonymen qatar daqyldardy ártaraptandyrý dınamıkasyn kórsetýde. 2025 jyly maıly daqyl alqaby alǵash ret 500 myń gektarǵa jetip, 2,5 ese ulǵaıdy. Aqmola oblysynyń ákimi Marat Ahmetjanov atap ótkendeı, bıyl egis kólemin 580 myń gektarǵa deıin ulǵaıtý josparlanyp otyr. Jalpy egis alqaby 5,6 mln gektardy quraıdy.
Kezdesýdiń negizgi taqyryby – Salyq kodeksiniń jańa normalary jáne Mal sharýashylyǵyn damytýdyń keshendi josparyn júzege asyrý. Aýyl sharýashylyǵy vıtse-mınıstri Amanǵalı Berdalın atap ótkendeı, jospar salanyń júıeli máselelerin, búkil óndiristik tizbek boıynsha qoljetimdi qarjylandyrý tapshylyǵyn sheshýge baǵyttalǵan. Ony júzege asyrýǵa 374 mlrd teńge qarastyrylǵan.
Naýryzdyń basynan beri jyldyq 6%-dan aspaıtyn belgilengen mólsherlememen «Igilik» jáne «Bereke» jańa nesıelik ónimderi iske qosyldy. Olar asyl tuqymdy mal satyp alýǵa baǵyttalǵan:
* «Igilik» – kólemi 100-den 500-ge deıin iri qara jáne 500-den 1000-ǵa deıin usaq mal sharýashylyǵy úshin;
* «Bereke» – kólemi 500 bas ІQM jáne 1000 bas usaq mal bolatyn iri sharýashylyq úshin.
Jaqyn arada aýyl sharýashylyǵy janýarlarynyń basqa túrleri boıynsha kredıt berý baǵdarlamalary keńeıtiledi.
Serik Jumanǵarın ımportqa táýeldilik saqtalatyn azyq-túlik óndirisin damytý, sondaı-aq aýyl sharýashylyǵy ónimin qaıta óńdeýdi tereńdetý basymdyq retinde qalyp otyrǵanyn basa aıtty. Memleket búginde salany qoldaý quraldaryn kúsheıtýde. Bul rette 2026 jyly mal sharýashylyǵyn elimizdiń básekelestik artyqshylyǵy retinde damytýǵa basty nazar aýdaryldy.
Kezdesý barysynda dıqandar birqatar usynys aıtty. «Otan» Agrofırmasy» JShS basshysy Ivan Saýer jer resýrstaryna baılanysty tıimdiliktiń naqty kórsetkishin belgileýdi jáne ony memlekettik qoldaý kórsetý kezinde eskerýdi usyndy. Sondaı-aq jyl boıy jaıylymdyq mal sharýashylyǵyn damytý qajet, bul onyń rentabeldiligin saqtaýǵa múmkindik beredi.
Sonymen qatar agrarlyq selektsııalyq jumystardy, atap aıtqanda, qoldan uryqtandyrý isin damytýǵa, otandyq jáne ımporttyq asyl tuqymdy maldy sýbsıdııalaý sharttaryn teńestirýge basa nazar aýdaryldy. Onyń aıtýynsha, otandyq asyltuqymdy mal syrt jerdikinen kem túspeıdi jáne jergilikti jaǵdaıǵa tolyqtaı beıimdelgen.
Bıznes ókilderi naqty máselelerdi qozǵady. «Logos greın» tobynyń dırektory Arman Qudaıbergenov aýyl sharýashylyǵy ónimin eksporttaýshylarǵa QQS óteý tetigi boıynsha suraq qoıyp, astyqty eksportqa jetkizýge kóliktik sýbsıdııa tóleý merzimin naqtylady.
«Agro Milk Projekt» JShS dırektory ıÝrıı Shvets 2024 jyly ÁKK arqyly jeńildikti nesıege sútti mal satyp alyp, 400 basqa arnalǵan TSF qurylymyn óz betinshe turǵyzǵanyn aıtty. Jaqyn arada kásiporyn keńeıtilip, taǵy 300-ge jýyq sútti mal satyp alýdy josparlap otyr. Qurylys-montaj jumysyn jeńildikpen nesıeleý múmkindigi máselesi kóterildi.
Barlyq suraqqa agrarshylar tolyq jaýap aldy.
Jumys sapary sheńberinde Serik Jumanǵarın birqatar kásiporynǵa da bardy. «Altyn Qazyq» JShS shıkizatty ósirýden bastap daıyn ónimdi shyǵarýǵa deıingi óńdeýdiń tolyq tsıklin júzege asyrady. Kásiporyn qurylymyna bordaqylaý alańy, soıý tsehy, veterınarlyq zerthana, kókónis qoımasy, shujyq tsehy kiredi. Aýyl sharýashylyǵy alqabynyń jalpy aýdany 12 myń gektar. Onyń 1 myń gektary sýarmaly. Qaıta óńdeý kólemi jylyna 10 myń tonna et ónimine jetedi. Kásiporyn Katarǵa qoı eksporttap, BAÁ naryǵyna shyǵýdy pysyqtaýda.
Sondaı-aq «IL-TOV» JShS (Aitas toby) zaýytynda da muzdatylǵan jartylaı fabrıkattardy qosa alǵanda, taýyq etin tereńdeı óńdeýdi óndirý jolǵa qoıylǵan. Shyǵarý kólemi jylyna 3346 tonna. Aldaǵy úsh jylda kásiporyn óndiristik qýatty arttyrýdy josparlap otyr.
Eske sala keteıik, Qazaqstan Respýblıkasynyń Premer-mınıstri Oljas Bektenov Geoscience & Exploration of Central Asia (GECA 2026) halyqaralyq geologııalyq forýmyna qatysqanyn jazǵan edik.
