Aqmola oblysynda aýyl sharýashylyǵy salasyndaǵy eńbek ozattary marapattaldy
Aqmola oblysynda aýyl sharýashylyǵy qyzmetkerleriniń kúni atalyp ótti. Onda salany damytýǵa eleýli úles qosqan bir top aqmolalyq túrli deńgeıdegi nagradalarmen marapattaldy, dep habarlaıdy Kazinform.
Oblys ákimdiginiń baspasóz qyzmetiniń málimetinshe, is-sharaǵa oblystyń iri aýyl sharýashylyǵy qurylymdarynyń ókilderi, agroónerkásip kesheniniń ardagerleri, sala mamandary qatysty.
Quttyqtaý sóz sóılegen aımaq basshysy Marat Ahmetjanov aýyl sharýashylyǵy salasynyń ekonomıkadaǵy mańyzyn atap ótti.
- Aqmola oblysy agrarly óńir sanalady. Elimizdegi astyqtyń tórtten biri bizdiń oblysymyzda óndiriledi. Óńirde agroónerkásip kesheni qarqyndy damyp keledi, jaqsy nátıjelerge qol jetkizilýde. Bıylǵy jylǵy qıyndyqtarǵa qaramastan dıqandarymyz 3 mln tonnadan astam astyq jınady. Bul bizdiń ishki qajettiligimizdi tolyq qamtamasyz etýge múmkindik berdi. Sonymen birge, oblysta mal sharýashylyǵyn damytý boıynsha da oń ózgerister baıqalady. Sharýashylyqtyń jalpy óniminiń kólemi jyl saıyn artyp keledi, biraq osyǵan qaramastan, biz osy salany damytýǵa erekshe nazar aýdarýymyz kerek, - dedi aımaq basshysy.
Sonymen birge, jıynda aýyl sharýashylyǵy tehnıkalaryn jańartý, etti jáne týaraly-sút fermalarynyń qýattyn arttyrý máselesi sóz boldy. Óńirde óndiris kólemin ulǵaıtý sheńberinde shamamen 300 mlrd teńge somasyna 71 ınvestıtsııalyq joba iske asyrylýda, bul et ónimderi, shıki sút, ósimdik maıy, un jáne jarma ónimderin óndirýdi ulǵaıtýǵa múmkindik beredi.
Іs-shara barysynda óńirde aýyl sharýashylyǵy salasyn damytýǵa eleýli úles qosqan bir top aqmolalyq túrli deńgeıdegi nagradalarmen marapattaldy.
Aıta ketsek, budan buryn Aqmola oblysyndaǵy kıik etin satatyn kombınatta jurt kezekte turǵanyn jazǵan edik.
