Aqmola oblysynda aýyl ákimi memlekettik qyzmettiń bedelin túsirgeni úshin jumystan bosatyldy

KÓKShETAÝ. KAZINFORM — Tselınograd aýdanynyń prokýratýrasy tirkelgen qylmys pen oqıǵalardyń jedel esebin taldaý barysynda laýazymdy tulǵa men memlekettik qyzmetke kir keltiretin áreket jasaǵan faktini anyqtady. Bul týraly Aqmola oblysy prokýratýrasy málim etti.

— Qoǵamdyq orynda masań kúıde birneshe adam arasynda janjal týyndap, nátıjesinde bir-birine dene jaraqatyn salǵany anyqtaldy. Atalmysh fakt boıynsha sotqa deıingi tergep-tekserý bastalyp, taraptardyń tatýlasýyna baılanysty toqtatyldy, — delingen habarlamada.

Aýdan prokýratýrasynyń aktisi negizinde memlekettik qyzmet isteri jónindegi ýákiletti organnyń Ádep jónindegi keńesiniń sheshimimen tártiptik teris qylyq jasaǵany úshin Qabanbaı batyr aýyldyq okrýg ákimi qyzmetinen bosatyldy.

Buǵan deıin habarlanǵandaı, Aqmola oblysynda qaraqshylyq shabýyl jasaǵan kúdiktiler ustaldy.