Aqmola oblysynda aýa raıynyń qolaısyzdyǵynan 1 500-den astam kólik jolda qaldy
ASTANA. KAZINFORM – Aýa raıynyń nasharlaýyna jáne joldardyń jabylýyna baılanysty Aqmola polıtseıleri 1 500-den astam kólikti dittegen jerine jetkizdi, dep habarlaıdy Kazinform tilshisi.
Aqmola oblystyq ІІD baspasóz qyzmetiniń habarlaýynsha, oblysta eki kún – 14 jáne 15 jeltoqsanda aýa raıy nasharlaǵan. Temperatýranyń tómendep, azdaǵan jaýyn-shashyn bolyp, jol kóktaıǵaq bolýyna baılanysty eki respýblıkalyq tas jolda kólik qozǵalysyn shekteý týraly sheshim qabyldanǵan.
– Patrýldik polıtsııa bólimsheleri jolda jınalyp qalǵan kólik qozǵalysyna retteýge kómektesti. Tártip saqshylary júrgizýshilerge kolonnada júrý erejelerin, belgilengen jyldamdyq pen ıntervaldy saqtaý qajettigin túsindirdi, - delingen habarda.
Aqmola polıtseıleri barlyǵy 1 000-nan astam jeńil kólikti, 500-ge jýyq júk kóligin, bir qoǵamdyq kólikti alyp júrdi. «Ekaterınbýrg-Almaty» tas jolynyń 1 291-1 353 shaqyrymy, Jibek joly kentinen Qaraǵandy oblysynyń shekarasyna deıin jáne «Astana-Ereımentaý-Shiderti» tas jolynyń 159-200 shaqyrymy, Ereımentaý qalasynan bastap Pavlodar oblysynyń shekarasyna deıin kólikterdi jetkizý qajettiligi týyndaǵan.
Polıtseıler júrgizýshilerdi «Qazgıdromet» habarlamasyn tyńdaýǵa jáne aýa raıy nasharlaǵan kezde eldi mekenderden tys jerlerge shyqpaýǵa shaqyrdy.
