Aqmola oblysynda astyqty tereń óńdeıtin alǵashqy zaýyt qurylysy bastaldy

ASTANA. KAZINFORM — Jyl basynan beri óńir ekonomıkasyna 660 mlrd teńgeden astam ınvestıtsııa tartyldy. Bul 4 myńnan astam jańa jumys ornyn ashýǵa múmkindik berdi. 

— Jyl basynan beri óńir ekonomıkasyna 660 mlrd teńgeden astam ınvestıtsııa tartyldy, ótken jylmen salystyrǵanda 250 mlrd teńgege kóp. Bul jańa kásiporyndar men tehnologııalar jáne jumys oryndary arqyly qamtamasyz etilgen naqty ósim. Tórt ındýstrııalyq aımaqtyń, onyń ishinde respýblıkalyq «Aqmola» aımaǵynyń qurylýy ınvestıtsııa tartýdyń negizgi quraly. Respýblıkalyq ındýstrııalyq aımaq ınvestorlar úshin naǵyz tartymdy ortalyqqa aınalyp otyr. Onda jalpy quny 1 trln teńgeden asatyn jobalar jınaqtaldy. Bul 4 myńnan astam jańa jumys ornyn ashýǵa múmkindik berdi, — dedi Aqmola oblysynyń ákimi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.

Odan ári óńir basshysy astyqty tereń óńdeıtin alǵashqy zaýyt qurylysynyń bastalǵanyn aıtty. Ol jerde 3 myńǵa deıin jumys orny paıda bolady, qazir memlekettik saraptamadan ótý úshin jobalyq-smetalyq qujattamany daıyndaý jumystary júrgizilip jatyr.

— Bul 1,8 mlrd AQSh dollary kólemindegi ınvestıtsııa. Onyń aıasynda jylyna 3 mıllıon tonnaǵa deıin astyq óńdeıtin zaýyt salý josparlanǵan (iske asyrý kezeńi: 2025-2028 jj). Eń mańyzdysy, bul jerde túpkilikti suranysqa ıe natrıı glýtamaty, krahmal jáne mıneraldy tyńaıtqyshtar óndiriledi. Odan bólek klınker ónimderi men qaptama kirpish shyǵaratyn jáne pestıtsıd pen tyńaıtqyshtar óndiretin zaýyttardyń qurylysy josparlanyp otyr, — dep tolyqtyrdy ákim.

Buǵan deıin Aqmola oblysynda qoǵamdyq tártip pen jol qaýipsizdigine baqylaý kúsheıtilgeni týraly habarlaǵan edik.