Aqmola oblysynda Astanaǵa qujatsyz et tasymaldaý derekteri anyqtaldy

ASTANA. KAZINFORM – Aqmola oblysynda elordaǵa veterınarııalyq jáne ilespe qujattarsyz et tasymaldaǵan eki kólik toqtatyldy.

Oblystyq Polıtsııa departamentiniń baspasóz qyzmetiniń málimetinshe, «Astana – Atbasar – Jaqsy» avtojolynyń 25-shaqyrymynda «Gazel» markaly avtokólik tekserilgen. Júk bóligin qaraý kezinde tórt iri qara maldyń ushasy tabylǵan. Júrgizýshi júkke qatysty veterınarııalyq jáne ilespe qujattarynyń joq ekenin birden moıyndaǵan.

Osy baǵytta dál sol ýaqytta taǵy bir quqyq buzýshylyq tirkelgen. Polıtseıler «Volkswagen Transporter» markaly shaǵyn avtobýsty toqtatyp, salonnan alty iri qara mal ushasyn anyqtaǵan. Júrgizýshiniń aıtýynsha, et Astana qalasynda satýǵa arnalǵan.

Eki jaǵdaıda da veterınarııalyq ilespe qujattardyń bolmaýy belgilengen talaptardyń buzylýy bolyp sanalady. Júrgizýshiler jaqyn mańdaǵy polıtsııa bólimine jetkizildi. Qazirgi ýaqytta ýchaskelik ınspektorlar zańnamaǵa sáıkes tıisti sharalardy qabyldap jatyr.

Aqmola oblysy PD patrýldik polıtsııa rotasynyń 3-vzvod komandıri Baqyt Qabkeshtiń aıtýynsha, azamattar kóbine jeke óndirgen et ónimderin qujatsyz tasymaldaıdy.

– Alaıda veterınarııalyq anyqtamalar men rastaıtyn qujattardyń bolmaýy eleýli suraqtar týyndatady. Sebebi mundaı qujattar ettiń aýrý maldan alynbaǵanyn jáne urlyq jolymen tabylmaǵanyn rastaıdy, – dedi ol.

Polıtsııa azamattardy zań talaptaryn saqtaýǵa jáne et ónimderin tasymaldaý kezinde barlyq qajetti qujattardy ózimen birge alyp júrýge shaqyrdy.

Buǵan deıin Aqmola oblysy tasjolynda bolǵan apatta júrgizýshi kóliktiń ishinde qysylyp qalǵany habarlandy.