Aqmola oblysynda «ArtSport» baǵdarlamasyn júzege asyrý kezinde qarjy jymqyrylǵan

Aqmola oblysynyń prokýratýrasy «ArtSport» baǵdarlamasyn júzege asyrý boıynsha jergilikti atqarýshy organdardyń qyzmetine tekseris júrgizdi, dep habarlaıdy Kazinform.

Vedomstvonyń málimetinshe, bul baǵdarlama balalardyń sport sektsııalary men shyǵarmashylyq úıirmelerine tegin qatysýy úshin qolǵa alynǵan. Jetkizýshilerdiń úı-jaılardy jalǵa alý jáne jattyqtyrýshylardyń jalaqysy úshin barlyq shyǵyndaryn memleket tóleıdi.

Alaıda, josyqsyz kásipkerler bul baǵdarlamany bıýdjet qarajatyn jymqyrý úshin paıdalandy. Tekserý barysynda jalǵan sektsııalar men úıirmelerdi ashý, ólgen damdardy rásimdeý derekteri anyqtaldy.

Mysaly, Ereımentaý qalasynda kásipker ústel tennısi jáne shahmat boıynsha sektsııalar, sondaı-aq dombyra men bı úıirmelerin ashty. Sonymen qatar, dombyra jáne shahmat oıyny boıynsha sabaqtar is júzinde ótkizilmegen, al qalǵan úıirmelerge qatysatyn balalardyń sany asyra kórsetilgen. Urlanǵan bıýdjet qarajatynyń jalpy somasy 6 mln teńgeni qurady.

Prokýratýra osy fakt boıynsha qylmystyq isti tirkedi, ol keıinnen sotqa joldandy.

Sot úkimimen atalǵan kásipker Qylmystyq kodekstiń 190-baby 3-bóligi boıynsha 3 jyl 6 aıǵa bas bostandyǵyn shekteý jazasyna kesildi. Memleketke keltirilgen materıaldyq zalal óteldi, shart buzyldy.

Taǵy bir mysal, Kókshetaý qalasynyń kásipkerleriniń biri voleıbol jáne ústel tennısi sektsııalaryn tirkedi. Eki sektsııada da birdeı balalar boldy, al is júzinde olar tek voleıbolǵa bardy, tennıs sabaqtary ótkizilmedi, biraq kásipker bıýdjet aqshasyn alǵany týraly tabel toltyrdy. Ol 6 aı ishinde 1 mln teńgeden astam qarjyny ıemdendi.

Qylmystyq is aqtalmaıtyn negizder boıynsha toqtatyldy, zalal óteldi, osy kásipkermen shart buzyldy.

Prokýratýra tekserý nátıjeleri boıynsha alaıaqtyq derekterimen osyndaı josyqsyz kásipkerlerge qatysty barlyǵy 5 qylmystyq is qozǵaldy, memleketke keltirilgen zalal kólemi 16 mln teńgeden asty.

Qazirgi ýaqytta barlyq isterdiń tergeýi aıaqtaldy, 3 aıyptaý úkimi shyǵarylyp, memleketke keltirilgen zalal tolyq kólemde óteldi.

Aıta ketsek, budan buryn Aqmola oblysynda bıýdjettiń 190 mln teńge qarjysyn jymqyrǵan sybaılastar sottalǵanyn jazǵan edik.