Aqmola oblysynda apatty jaǵdaıdaǵy jáne úsh aýysymdy mektepter máselesi tolyq sheshildi — ákim
ASTANA. KAZINFORM — Óńir aýmaǵynda sońǵy eki jylda 19 myńnan astam orynǵa arnalǵan 24 jańa mektep salyndy. Bilim salasynyń damý áleýeti týraly tolyǵyraq oblys ákimi Marat Ahmetjanov aıtyp berdi.
— Oblysta bilim nysandarynyń ınfraqurylymyn jańartýǵa baǵyttalǵan birneshe iri joba júzege asyryldy. Qazir óńirde apatty jaǵdaıdaǵy jáne úsh aýysymdy mektepter máselesi tolyq sheshildi. Sońǵy eki jylda 19 myńnan astam orynǵa arnalǵan 24 jańa mektep salyndy. Sonyń ishinde «Keleshek mektepteri» ulttyq jobasy aıasynda 12 200 orynǵa arnalǵan 9 mektep bar, — dedi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.
Sondaı-aq bıyl Kókshetaý qalasynda jeke ınvestıtsııa esebinen zamanaýı úlgide jabdyqtalǵan jańa mektep salynǵan.
— Sonymen qatar, óńirde daryndy balalardy damytýǵa erekshe kóńil bólinedi. Aıtar bolsaq, Kókshetaýda zamanaýı «Bilim-ınnovatsııa» lıtseı-ınternaty 600 oryndyq jataqhanasymen salyndy, Şýchınsk qalasynda IT-lıtseı (300 oryndyq) jataqhanasynyń qurylysy aıaqtalýǵa jaqyn. Prezıdent Joldaýy aıasynda oblysta bıylǵa josparlanǵan barlyq 20 mektep tolyqtaı jańǵyrtyldy. Jumysshy mamandyqtary jyly aıasynda 750 oryndyq 2 jataqhana salyp, kolledj stýdentteri jataqhanamen qamtyldy, — deıdi oblys basshysy.
Buǵan deıin habarlaǵanymyzdaı bıyl 7 myńnan astam aqmolalyq turǵyn úı jaǵdaıyn jaqsartty.
Bıyl Aqmola oblysynyń dıqandary rekordtyq kólemde astyq jınady.
Aıta keteıik, Aqmola oblysynda astyqty tereń óńdeıtin alǵashqy zaýyt qurylysy bastaldy.
Sondaı-aq 2026 jyly Qosshyda jańa elektr energııasy stantsııasy salyna bastaıdy.