Aqmola oblysynda altyn óńdeıtin jasyryn tseh anyqtaldy
ASTANA. KAZINFORM — Qarjylyq monıtorıng agenttiginiń Aqmola oblysy boıynsha departamenti prokýratýranyń úılestirýimen Shortandy aýdany aýmaǵynda baǵaly metaldardy zańsyz óndirýmen aınalysqan adamdar tobynyń qyzmetin toqtatty.
Vedomstvonyń málimetinshe, jedel-izdestirý sharalary barysynda quramynda altyny bar kendi óńdeýge jáne baǵaly metaldardy bólip alýǵa arnalǵan jasyryn tseh anyqtaldy.
— Kendi usaqtaýǵa jáne balqytýǵa arnalǵan jabdyq, salmaǵy 446 gramm altyn quımasy, 4 tonna altyn quramdy materıal, 6 keli synap, sondaı-aq 2 mln teńgeden astam jáne 8 myń AQSh dollary kólemindegi aqshalaı qarajat tárkilendi, — delingen habarlamada.
Tintý barysynda qarý men oq-dáriler tabyldy.
Qazirgi ýaqytta zańsyz qyzmetke qatysy bar barlyq tulǵa, sondaı-aq zańsyz óndirilgen baǵaly metaldardyń kólemi anyqtalyp jatyr.
Uıymdastyrýshy qamaýǵa alyndy. Tergeý jalǵasyp jatyr.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
Eske salaıyq, buǵan deıin Astanada dúkender men dámhanalarǵa qaýipti et jetkizgen jasyryn tseh anyqtalǵanyn habarlaǵanbyz.
