Aqmola oblysynda alty adam kene entsefalıtin juqtyryp, úsheýi borrelıozǵa shaldyqqan
ASTANA. KAZINFORM — Epıdemıologııalyq maýsym bastalǵaly beri Aqmola oblysynda 849 adamdy kene shaqqan, dep habarlaıdy Kazinform tilshisi.
Aqmola oblysynyń sanıtarııalyq-epıdemıologııalyq baqylaý departamentiniń málimetinshe, epıdemıologııalyq maýsym bastalǵaly óńirde kene entsefalıtiniń zerthanalyq jolmen rastalǵan alty jaǵdaıy tirkelgen. Onyń ekeýi Býrabaı aýdanynda, ekeýi Sandyqtaý aýdanynda jáne taǵy ekeýi Kókshetaý qalasynda anyqtalǵan.
Sonymen qatar kene borrelıozynyń úsh jaǵdaıy tirkeldi. Onyń ekeýi Sandyqtaý aýdanynda, bireýi Býrabaı aýdanynda anyqtalǵan.
— 2025 jyldyń sáıkes kezeńimen salystyrǵanda kene ınfektsııalarymen syrqattaný deńgeıi 1,5 ese óskeni baıqalady. Byltyr osy kezeńde kene entsefalıtiniń tórt jaǵdaıy jáne kene borrelıozynyń eki jaǵdaıy ǵana tirkelgen, — dep habarlady vedomstvoda.
Epıdemıologııalyq maýsym bastalǵaly beri kene shaqqan 849 Aqmola turǵynynyń 227-si — 14 jasqa deıingi balalar. Bul kórsetkish boıynsha da 2025 jyldyń sáıkes kezeńimen salystyrǵanda ósim baıqalady.
602 adamǵa ımmýnoglobýlınmen profılaktıkalyq em júrgizildi. Immýnoglobýlın almaǵan 247 adamnyń 13-i medıtsınalyq kómekke úsh táýlikten keıin, ıaǵnı kesh júgingen. Eki adamda medıtsınalyq qarsy kórsetilimder bolǵan, bir adam buǵan deıin ımmýnoglobýlın alǵan, taǵy bir adam vaktsına saldyrǵan. 12 adam ımmýnoglobýlın alýdan óz erkimen bas tartqan. Al 218 adamdy kene endemııalyq emes aýmaqta shaqqan.
— Kene entsefalıtiniń tabıǵı oshaqtary ornalasqan aýmaqtarda, atap aıtqanda Sandyqtaý aýdanynda turatyn jáne medıtsınalyq kómekke júgingen adamdarǵa preparat óndirýshi qosa beretin nusqaýlyqqa sáıkes belgilengen merzimde ımmýnoglobýlınmen seroprofılaktıka júrgiziledi. Qoldanystaǵy zańnamaǵa sáıkes, kene entsefalıti taralǵan tabıǵı aýmaqta jumys isteıtin adamdarǵa aýrýdyń aldyn alý úshin vaktsına salynady. Olardyń qatarynda orman sharýashylyǵynyń qyzmetkerleri, aǵash kesetin tseh jumysshylary, aǵash kesýshiler, ormanshylar, malshylar, mehanızatorlar, sondaı-aq qyzmetine baılanysty tabıǵı oshaqtarǵa turaqty túrde baratyn adamdar bar. 2026 jyly kene entsefalıtine qarsy vaktsına alýy tıis 357 adamnyń 303-i, ıaǵnı 85 paıyzy vaktsına saldyrdy, — dep tolyqtyrdy vedomstvo.
Sandyqtaý aýdanynyń turǵyndaryna jáne endemııalyq aýmaqta kene shaqqan adamdarǵa ımmýnoglobýlın alý úshin shuǵyl túrde medıtsınalyq kómekke júginý qajet.
Oblystyń basqa aýmaqtarynda kene shaqqan jaǵdaıda shuǵyl ımmýnoprofılaktıka alǵashqy 72 saǵat ishinde júrgiziledi. Bul aýrý qaýpin azaıtý úshin óte mańyzdy. Al medıtsınalyq kómekke kesh júgingen jaǵdaıda ımmýnoglobýlın qoldanylmaıdy.
Buǵan deıin Soltústik Qazaqstan oblysynda jeti adam kene entsefalıtin juqtyrǵany habarlanǵan bolatyn.
