Aqmola oblysynda alǵashqy «aqyldy» qoqys óńdeý kesheni iske qosylady
KÓKShETAÝ. KAZINFORM — Aqmola oblysynda Şýche qalasynda qatty turmystyq qaldyqtardy suryptaý jáne qaıta óńdeý kesheniniń qurylysy aıaqtalýǵa jaqyn.
Joba memlekettik-jekemenshik áriptestik aıasynda júzege asyrylyp jatyr jáne jeke ınvestor qarajatyna salynýda. Kásiporyndy osy jyldyń sońyna deıin iske qosý josparlanǵan.
Býrabaı aýdany týrıster kóp keletin óńirlerdiń biri bolǵandyqtan, turmystyq qaldyqtardyń kólemi de jyl saıyn artyp keledi. Osyǵan baılanysty aýdanda qaldyqtardy suryptaý men qaıta óńdeý júıesin engizý qolǵa alyndy.
Jańa keshenniń jyldyq qýaty 40 myń tonnaǵa deıin jetedi. Bul aýdan aýmaǵynda jınalatyn turmystyq qaldyqtardyń negizgi bóligin óńdeýge múmkindik beredi. Qaldyqtardy tasymaldaý úshin toǵyz arnaıy tehnıka satyp alynady. Onyń úsheýi elektr qýatymen jumys isteıdi.
Joba aıasynda qaldyqtardy bólek jınaý júıesi engiziledi. Keshende 10 klımattyq kamera ornatylady. Onda organıkalyq qaldyqtar óńdelip, tehnıkalyq topyraqqa aınaldyrylady. Keıin bul ónim kógaldandyrý jáne abattandyrý jumystaryna paıdalanylady.
Aýdan ákimdiginiń málimetinshe, Býrabaı aýdanynda qazir 18 ınfraqurylymdyq joba júzege asyrylyp jatyr. Jyl sońyna deıin olardyń beseýin aıaqtaý josparlanǵan. Atap aıtqanda, magıstraldyq sý qubyry jelilerin salý, Şýche qalasynyń sý burý júıelerin jańǵyrtý, Sarybulaq jolaıryǵynan Býrabaı kentine deıingi joldy jaryqtandyrý jáne kent kóshelerine jaryq ornatý jumystary júrgizilip jatyr.
Jańa qoqys óńdeý kesheniniń iske qosylýy Býrabaı aýdanyndaǵy qaldyqtardy basqarý júıesin jetildirýge jáne qorshaǵan ortaǵa túsetin júktemeni azaıtýǵa múmkindik beredi.
