Aqmola oblysynda alǵash ret úzdik agrarshylar «Aqmola — eńbek ozaty» tósbelgisimen marapattaldy
ASTANA. KAZINFORM — Kókshetaý qalasynda aýyl sharýashylyǵy taýaryn óndirýshilerdiń birinshi óńirlik forýmynda mańyzdy oqıǵa boldy — Aqmola oblysynda alǵash ret aýyl sharýashylyǵy salasynyń qyzmetkerleri oblys ákiminiń «Aqmola — eńbek ozaty» tósbelgisimen marapattaldy.
Bul joǵary marapatqa aımaqtyń damýyna qosqan zor úlesi, joǵary kásibıligi, kóp jyldyq jemisti eńbegi jáne óz qyzmetindegi joǵary jetistikteri úshin agrarlyq salanyń 40-tan astam úzdik ókilderi ıe boldy.
El prezıdenti Qasym-Jomart Toqaev Respýblıkalyq forýmda agrarshylardyń eńbeginiń mańyzdylyǵyn atap ótken bolatyn.
Aqmola oblysy elimizdiń negizgi agrarlyq óńirleriniń biri bolyp tabylady. Bıylǵy jyly fermerlerdiń qajyrly eńbeginiń arqasynda 4,7 mıllıon gektar alqaptan 6,6 mıllıon tonna dándi jáne burshaqty daqyldar jınaldy. Ortasha ónimdilik gektaryna 14 tsentnerden asty, al ónimdiliktiń 60%-y joǵary sapaly bıdaı.
Aımaqtyń jetekshi sharýashylyqtarynyń biriniń basshysy Ivan Saýer alǵysyn bildirdi.
«Aqmola oblysynda alǵash ret aýqymdy is-shara ótkizilip, onda eńbek adamyna tıisti kóńil bólindi. Bul marapat — óńirdiń jáne búkil eldiń damýyna qosqan úlesimizdi qurmetteý men moıyndaýdyń belgisi», — dedi I.Saýer.
«Aqmola — eńbek ozaty» tósbelgisi Qazaqstannyń azyq-túlik qaýipsizdigin qamtamasyz etetin jáne óńirdiń ekonomıkasyn nyǵaıtatyn agrarshylarǵa sińirgen eńbegin moıyndaý men qurmetteýdiń sımvolyna aınaldy.
Eske salsaq, buǵan deıin Aqmola oblysyndaǵy «Qazsýshar» fılıaly Sileti sý qoımasyndaǵy qaqpalardy jóndegeni habarlandy.
