Aqmola oblysynda alaıaqtyq jolmen bıýdjet aqshasyn jymqyrǵan esepshi sottaldy

Aqmola oblysynda bóbekjaı esepshisi alaıaqtyq jolmen bıýdjetten 7 mıllıon teńgeden astam aqsha jymqyrǵan, dep habarlaıdy QazAqparat tilshisi Aqmola oblystyq sotynyń baspasóz qyzmetine silteme jasap.

Sotta anyqtalǵandaı, aıyptalýshy 2021- 2022 jyldar aralyǵynda ózine joǵary eńbekaqy qoıý arqyly 7 mıllıon teńgeden astam bıýdjet qarajatyn urlaǵan. Sotta aıyptalýshy kinásin moıyndady, ókinip, zalaldy ishinara ótedi.

Budan basqa, onyń kinási aýdıtorlyq kompanııanyń qorytyndysymen, kýágerlerdiń aıǵaqtarymen, júrgizilgen arnaıy jedel-izdestirý is-sharalarynyń nátıjelerimen, tólem tapsyrmalarymen rastaldy.

«Kókshetaý qalalyq soty oǵan materıaldyq jaýapkershilikke baılanysty qyzmetpen aınalysý quqyǵynan aıyra otyryp, 3 jyl 6 aı bas bostandyǵynan aıyrý jazasyn taǵaıyndady. Keltirilgen materıaldyq zalal óndirildi. Sottalýshynyń asyraýyndaǵy úsh jastaǵy balasy bar ekenin eskere otyryp, sot bas bostandyǵynan aıyrý túrindegi jazany oryndaýdy 5 jylǵa keıinge qaldyrdy. Úkim zańdy kúshine engen joq», - dedi vedomstvodan.

Sonymen birge, sot laýazymdy tulǵalardyń fýnktsıonaldyq mindetterine nemquraıly qaraǵany jáne tıisti baqylaýdyń joqtyǵy úshin bilim basqarmasyna jeke qaýly shyǵardy.

Aıta ketsek, budan buryn Kókshetaýda qarjy pıramıdasyn qurǵan eki jigit 5 jylǵa sottalǵanyn jazǵan edik.