Aqmola oblysynda ákesi men balasyna naızaǵaı túsip, mert boldy

ASTANA. KAZINFORM — Qaıǵyly oqıǵa 1 maýsym kúni Aqmola oblysynyń Zerendi aýdanynda boldy, dep habarlaıdy Kazinform agenttiginiń menshikti tilshisi. 

Bar aqparatqa sáıkes, 37 jastaǵy er adam men onyń 9 jastaǵy uly mal baǵyp júrgen kezde naızaǵaı túsken. Naızaǵaıdyń jarqyly ekeýine de ajal qushtyrdy. 

Aqmola oblysy polıtsııa departamentiniń habarlaýynsha, Zerendi aýdany turǵyny men onyń kámeletke tolmaǵan ulynyń qaza bolýyna baılanysty qylmystyq is qozǵaldy.

– Qaıǵyly oqıǵanyń mán-jaıyn anyqtaý boıynsha sharalar júrgizilip jatyr. Tekserý nátıjesi boıynsha sońǵy protsessýaldyq sheshim qabyldanady, – dep atap ótti vedomstvodan. 

Buǵan deıin Aqtóbede bir apta buryn joǵalyp ketken dárigerdiń máıiti tabylǵany habarlanǵan. Polıtsııa bul fakti boıynsha da qylmystyq is qozǵaǵan.

Buǵan deıin BQO-da Shalqar kóliniń jaǵasynda áıel adamǵa naızaǵaı túsken edi.