Aqmola oblysynda agroónerkásip kesheniniń úzdik ókilderi marapattaldy
ASTANA. KAZINFORM - Óńirde baǵaly bilim men tájirıbe urpaqtan-urpaqqa berilip, naǵyz eńbek áýletterin qalyptastyrǵan mysaldar kóp.
Respýblıkalyq aýyl sharýashylyǵy qyzmetkerleriniń forýmynda Prezıdent Qasym-Jomart Toqaev memlekettik nagrada alǵandardyń qatarynda zootehnıkter, shopandar, tehnologtar men kombaınshylar bar ekenin atap ótti. Jalpy, Qazaqstan boıynsha 100-den asa adam marapattaldy. Adal eńbekti dáripteıtin mundaı tulǵalar jastarǵa úlgi bolýda.
Oblys ákimi Marat Ahmetjanov birinshi óńirlik forým barysynda aýyl sharýashylyǵy qyzmetkerleri óńir ekonomıkasynyń tiregi ekenin jáne olardyń eńbegi joǵary qurmet pen rızashylyqqa laıyq ekenin aıtty. Mereke qarsańynda Prezıdenttiń Jarlyǵymen toǵyz aqmolalyq agrarıı memlekettik nagrada aldy.
Óndiris ozattary – saýynshylar, mehanızatorlar, agronomdar, júrgizýshiler, qus ósirýshiler jáne basqa da erekshe eńbek nátıjesine qol jetkizgender qurmet gramotalarymen, alǵys hattarmen jáne aqshalaı syıaqymen marapattaldy.
Óńirlik Forým aıasynda salanyń damýyna eleýli úles qosqan Gorodetskıı, Raıskıı jáne Kaspıev eńbek áýletterine avtokólikter syıǵa tartyldy.
«Bizdiń óńirde qundy bilim men tájirıbeni urpaqtan-urpaqqa jalǵastyryp, naǵyz eńbek áýletterin qalyptastyrǵan mysaldar jetkilikti. Túrkınder, Áripovter, Zakýsılovtar, Ysqaqovtar, Muqyshevter jáne Qurmanqulovtar áýletteri aýyl sharýashylyǵynda óz isterin tabysty júrgizýde. Bul urpaqtar sabaqtastyǵynyń ǵana emes, óz isine degen shynaıy súıispenshiliktiń de úlgisi. Bul otbasylyq qundylyqtar men kásibı kózqarasty ushtastyratyn eńbek joly», – dep atap ótti óńir basshysy.
«Bul kólik meniń otbasyma syılyq bolyp qana qoımaı, bizdiń urpaqtyń sımvoly bolady. Jaqsy ómir súrýge barlyq jaǵdaı jasalǵan «Agrofırma TNK» JShS-de uzaq jyldar boıy jumys istep kelemiz. Eńbegimizdi baǵalap, senim artqandaryńyzǵa kóp rahmet», – dedi óz jaýabynda Eńbek áýletiniń basshysy Sergeı Raıskıı.
Alǵash ret birqatar agrarııler «Aqmola – eńbek ozaty» tósbelgisimen marapattaldy. Olardyń qatarynda mehanızatorlar Dúısembaı Ysqaqov pen Vladımır Gerasımov, Sotsıalıstik Eńbek Erleri Esilbaı Qadralın men Valentın Şerbakov, eńbek adamy, Birjan sal aýdanynyń qurmetti azamaty Altynaı Bazylova bar.
