Aqmola oblysynda adam saýdasyna qatysty úsh is toqtatyldy
KÓKShETAÝ. KAZINFORM — Bıyl Aqmola oblystyq Uıymdasqan qylmysqa qarsy kúres departamentiniń qyzmetkerleri adam saýdasyna qatysty 14 qylmys anyqtady, dep habarlaıdy Kazinform agenttigi.
Aqmola oblystyq polıtsııa departamentiniń málimetinshe, aımaqta adam saýdasyna qatysty isterdi anyqtaýǵa baǵyttalǵan «Stop trafık» operatsııasy júrgizildi.
«Úsh kún ishinde Uıymdasqan qylmysqa qarsy kúres departamentiniń qyzmetkerleri reıdter men jedel tergeýler júrgizdi. Sonyń nátıjesinde jezóksheler úıin uıymdastyrý jáne ustaý, sýtenerlik, sondaı-aq onlaın-resýrstar arqyly jezókshelikti jarnamalaý jáne nasıhattaý oqıǵalary anyqtaldy», dep habarlady departament.
Máselen, Kókshetaýda ıntımdik qyzmet usynatyn massaj salony jumys isteıtini belgili boldy. Sotqa deıingi tergeý barysynda mekeme ıeleriniń Qaraǵandy turǵyndary ekeni anyqtaldy.
«Sondaı-aq qyzmetkerler beıádep jynystyq qatynas pen otbasylyq qundylyqtardy joqqa shyǵarýdy nasıhattaıtyn rýhanı ortalyq uıymdastyrǵan toptyń qyzmetin toqtatty. Tintý kezinde dinı ádebıetter men rásimdik zattar tabyldy. Tıisti sot-medıtsınalyq saraptama taǵaıyndaldy jáne tergeý amaldary júrgizilip jatyr», delingen polıtsııa málimdemesinde.
«Stop trafık» operatsııasy aıasynda barlyǵy 11 adam tirkeldi. Bıyl Uıymdasqan qylmyspen kúres qyzmetkerleri adam saýdasyna qatysty 14 qylmysty anyqtady.
Buǵan deıin elimizde jyl basynan beri adam saýdasyna qatysty 285 qylmystyq is tirkelgenin habarlaǵan edik.