Aqmola oblysynda 9 kún buryn úıinen ketip qalǵan áıel izdestirilýde

Aqmola oblysynyń Stepnogor qalasynda 9 kún buryn úıinen ketip qalǵan áıelge izdeý jarııalandy, dep habarlaıdy Kazinform.

Oblystyq Polıtsııa departamenti baspasóz qyzmetiniń málimetinshe, 2023 jyldyń 8-shi qarashasynda Stepnogor qalalyq PB kezekshi bólimine 23 jastaǵy jergilikti turǵyn habarlasyp, 22 jastaǵy áıeli Elena Sergeevna Moıseevanyń joǵalǵanyn aıtqan.

Er adamnyń sózinshe, áıeli 2023 jyldyń 31 qazanynda tańǵy saǵat 08:00 shamasynda úıinen shyǵyp ketken. Sodan beri odan esh habar joq, uıaly telefony óshirýli.

Joǵalǵan adamnyń boıy 160-165 sm, dene bitimi ortasha, shashy qara qysqa, kózderi qońyr, murny túzý, erni juqa, qulaǵy kishirek kelgen.

Ústine qyzǵylt sary shápke, qara, qysqa kýrtka, qara djınsy, qara etik kıgen, ózimen birge jasyl tústi sómkesi bar.

- Jedel-izdestirý is-sharalaryn ótkizý barysynda joǵalǵan adamnyń bank kartasynan Astana qalasynda qoldanylǵany anyqtaldy. Qazirgi ýaqytta izdeý sharalary jalǵasýda, joǵalǵan adam týraly aqparat jáne baǵdarlar polıtsııa departamentiniń barlyq aýmaqtyq bólimshelerine jáne kórshiles aımaqtarǵa jiberildi. Elena Sergeevna Moıseevanyń ornalasqan jeri týraly qandaı da bir aqparat biletin adamdar dereý ishki ister organdaryna habarlasýyn suraımyz, - dedi vedomstvodan.

Aıta ketsek, budan buryn Aqmola oblysynda joǵalǵan stýdent qyz Astanadan tabylǵanyn jazǵan edik.