Aqmola oblysynda 82 mln teńgege baǵalanǵan jer memleketke qaıtaryldy

ASTANA. KAZINFORM – Aqmola oblysy prokýratýrasy qabyldaǵan sharalardyń nátıjesinde quny 82 mln teńge bolatyn aýyl sharýashylyǵy maqsatyndaǵy jer ýchaskeleri memleket menshigine qaıtaryldy. 

Vedomstvo málimetinshe, Sandyqtaý aýdanynyń prokýratýrasy jer komıssııasynyń qyzmetine taldaý júrgizý barysynda aýyl sharýashylyǵy óndirisin júzege asyrý úshin ýaqytsha óteýli jer paıdalaný quqyǵyn berý jónindegi konkýrstyń qorytyndylaryn shyǵarý kezinde zańnama talaptarynyń buzylǵanyn anyqtaǵan.

Atap aıtqanda, konkýrs qorytyndylary úsh kezeńde shyǵarylǵany belgili boldy. Al qoldanystaǵy zańnamaǵa sáıkes, konkýrs ótkizilgennen keıingi kúni qorytyndy birden jarııalanýy tıis. Bul jaǵdaı konkýrs rásimderiniń ashyqtyǵy men obektıvtiligine keri áser etken.

- Prokýrorlyq qadaǵalaý aktisiniń negizinde sot tártibimen jeti jaldaý sharty jaramsyz dep tanyldy. Nátıjesinde jalpy aýdany 1 400 gektar bolatyn, quny 82 mln teńge aýyl sharýashylyǵy maqsatyndaǵy jer ýchaskeleri memleket menshigine qaıtaryldy, - delingen aqparatta.

Atalǵan zańbuzýshylyqtarǵa jol bergen kináli laýazymdy tulǵalar ákimshilik jaýaptylyqqa tartyldy.

Aıta keteıik, buǵan deıin osy óńirde quny 332,5 mln teńge bolatyn jer memleket menshigine qaıtarylǵan bolatyn.