Aqmola oblysynda 80 myńnan astam adam JRVI juqtyrdy

ASTANA. KAZINFORM — Aqmola oblysynda epıdemııalyq maýsym bastalǵaly beri 80 myńnan astam jiti respıratorlyq vırýstyq ınfektsııa tirkeldi.

Aqmola oblysy boıynsha sanıtarlyq-epıdemıologııalyq baqylaý departamentiniń málimetinshe, 2025-2026 jylǵy epıdemııalyq maýsym bastalǵaly óńirde 80 026 JRVI tirkeldi. Syrqattyń basym bóligin 14 jasqa deıingi balalar juqtyrǵan — 65,6% (52 562 jaǵdaı).

— Ótken jyldyń osy kezeńimen salystyrǵanda balalar arasyndaǵy aýrýshańdyq 0,9 esege artqan. Syrqattyń kóbeıýi barlyq jas aralyqta baıqalady. Aǵymdaǵy epıdemııalyq maýsym A tumaýy vırýsynyń belsendi aınalymymen júretin aýrýlardyń kúrt ósýimen sıpattalady. Jedel respıratorlyq vırýstyq ınfektsııalardyń eń joǵary deńgeıi 46-shy aptadan bastap tirkeledi, — delingen aqparatta.

2026 jyldyń basynan beri JRVI-diń 5282 jaǵdaıy tirkeldi. Bıyl da 14 jasqa deıingi balalar arasynda syrqattanǵandar kóp — 59,6% (2233 jaǵdaı).

Oblystyq sanıtarlyq dárigerler aqmolalyqtardy JRVI men tumaýdyń taralý qaýpin azaıtý úshin arnaıy emes profılaktıkalyq sharalardy saqtaýǵa shaqyrdy.

— Epıdemııalyq órshý kezinde halyq kóp jınalatyn oryndarǵa barýdy shekteý qajet. Jeke bas gıgıenasyn saqtaý, qoldy únemi sabynmen jýý, jýylmaǵan qolmen betti ustamaý mańyzdy. Bólmelerdi únemi jeldetip, dymqyl tazalaý sharasyn júrgizý usynylady, — dep túsindirdi sanıtarlyq dárigerler.

Dene qyzýynyń kóterilýi, jótel, murynnyń aǵýy, tamaq aýrýy syndy belgiler paıda bolsa, dereý medıtsınalyq kómekke júginip, kópshilik ortadan alystap, úıde oqshaýlanǵan jón. Bul ınfektsııanyń odan ári taralýyn boldyrmaıdy.

Aıta keteıik, Túrkistan oblysynda da JRVI-men syrqattanǵandar sany artty. Shyǵys Qazaqstan oblysynda 130 myńnan astam adam JRVI juqtyrdy.