Aqmola oblysynda 8 laýazymdy tulǵa memlekettik satyp alýda zań buzǵany úshin 2 mln teńge aıyppul arqalady

KÓKShETAÝ. KAZINFORM – Aqmola oblysy prokýratýrasynyń sharalarymen memlekettik organdardyń laýazymdy tulǵalary memlekettik satyp alýdan zańsyz bas tartqany úshin jaýapqa tartyldy. Bul týraly Aqmola oblysynyń prokýratýrasynyń baspasóz qyzmeti málim etti.  

Oblys prokýratýrasy memlekettik satyp alý salasyndaǵy zańdylyqtyń saqtalýyna taldaý júrgizý barysynda memlekettik organdar «Memlekettik satyp alý týraly» Qazaqstan Respýblıkasynyń Zańyn buza otyryp, jalpy somasy 3,8 mlrd teńgege nemquraıly sebepterimen satyp alýdan birqatar bas tartýdy júzege asyrǵanyn anyqtaǵan.

«Mysaly, aýdannyń qurylys bólimderiniń biri obektiniń kúrdelilik deńgeıin durys kórsetpeý, bas jospardyń jáne basqa da qujattamanyń bolmaýy sebebinen memlekettik satyp alýdan bas tartqan. Bul negizder memlekettik satyp alýdan bas tartý jáne odan ári shart jasaspaý úshin qoldanylmaıdy (Zańnyń 5-baby 13-tarmaǵy). Osylaısha, memlekettik organdardyń atalǵan zańsyz áreketteri kásipkerlerdiń quqyqtaryn, adal básekelestik qaǵıdatyn buzady jáne sybaılas jemqorlyq táýekelderine alyp keledi», — dep habarlady prokýratýradan.

Oblys prokýratýrasynyń usynýy boıynsha 8 laýazymdy tulǵa ákimshilik jaýapkershilikke tartylyp, jalpy somasy 2 mln teńgeden astam aıyppul salyndy.

Eske sala keteıik, Bas prokýratýra ınternette sýıtsıdti nasıhattaý boıynsha 3 qylmystyq is qozǵady.