Aqmola oblysynda 77 jylqy urlady degen kúdikpen ákesi men balasy ustaldy
ASTANA. KAZINFORM — Aqmola oblysynda 77 jylqyny urlady degen kúdikpen ákesi men balasy ustaldy. Mal ıesine keltirilgen shyǵyn 25,4 mıllıon teńgeden asty. Qazirgi ýaqytta urlanǵan jylqylardyń 40-tan astamy ıesine qaıtaryldy.
Polıtsııanyń habarlaýynsha, bıyl mamyr aıynda polıtsııaǵa Ereımentaý aýdanyndaǵy aýyldardyń birinde erkin jaıylymda júrgen 77 jylqynyń joǵalǵany týraly aryz túsken. Osy fakti boıynsha qylmystyq is qozǵalyp, kúdiktilerdi anyqtaý úshin arnaıy jedel toptar quryldy.
Krımınaldyq polıtsııa basqarmasynyń qyzmetkerleri aýdandyq polıtsııa bólimindegi áriptesterimen birlesip, birneshe aı boıy jedel-izdestirý sharalaryn júrgizdi. Olar buryn mal urlyǵy úshin sottalǵandardy tekserip, et bazarlary men urlanǵan maldy ótkizýi múmkin basqa da oryndardy zerttedi.
Nátıjesinde kúdiktilerdiń jeke basy anyqtaldy. Olar Stepnogorsk qalasynyń turǵyndary — ákesi men balasy bolyp shyqty.
Tergeý málimetinshe, kúdiktiler kóktemde urlanǵan jylqylardy Ereımentaý aýdanynan Stepnogorsk qalasyna aıdap áketken. Olar maldy qala syrtyndaǵy qoralarda ustap, keıin birtindep satqan.
Kúdiktiler ustalǵannan keıin polıtseıler jylqylardyń 40-tan astamyn taýyp, ıesine qaıtardy. Qazirgi ýaqytta ákesi men balasy qamaýda otyr.
Eske salaıyq, buǵan deıin Jambyl oblysynda úsh er adam 11,5 mln teńgeniń malyn urlaǵanyn jazǵan edik.
