Aqmola oblysynda 7 myńnan astam bala jaıly mektepte oqyp jatyr

ASTANA. KAZINFORM – Bıyl Aqmola oblysynda «Jaıly mektep» ulttyq jobasy aıasynda 7 200 oryndyq 6 mektep salyndy. Óńirdegi bilim berý jáne densaýlyq saqtaý salasynda atqarylyp jatqan jobalar týraly ákim Marat Ahmetjanov aıtyp berdi.

- Bıyl salynǵan jaıly mektepterde qazir balalar bilim alyp jatyr. Sol sııaqty Tselınograd aýdanynyń Qoıandy aýylynda jáne Kókshetaý qalasynda 5 myń oryndyq úsh mekteptiń qurylysy aıaqtalyp qaldy. Jaıly mektepterdiń aýmaǵy qarapaıym mektepterden 15-20 paıyzǵa, tehnıkalyq jabdyqtalýy 4 ese artyq. Sonymen qatar, Qosshy qalasynda 1200 oryndyq mektep qurylysy aıaqtaldy. Bıyl oblys ortalyǵynda 446 oryndyq eki balabaqsha iske qosyldy, al keler jyly taǵy úsh balabaqsha paıdalanýǵa beriledi, - dedi Marat Ahmetjanov óńirdiń áleýmettik-ekonomıkalyq damý barysy týraly esep bere turyp.

Sondaı-aq óńir ákimi oblystaǵy densaýlyq saqtaý salasy damýynyń búgingi jaıymen tanystyrdy.

- Aýyldyq densaýlyq saqtaýdy jańǵyrtý» ulttyq jobasy boıynsha bastapqy medıtsınalyq-sanıtarııalyq kómek obektileri salynyp jatyr. Jańa obektiler 38 eldi mekende turatyn 43 myń adamdy medıtsınalyq kómekpen qamtıdy. Jyl sońyna deıin zamanaýı jabdyqpen qamtylǵan 28 densaýlyq saqtaý obekti salynady jáne keler jyly taǵy 10 obekti qurylysyn aıaqtaý josparlanyp otyr. Sonymen qatar qazir Stepnıak qalasynda aýdandyq aýrýhana salynyp jatyr, - deıdi ol.

Marat Ahmetjanovtyń aıtýynsha, densaýlyq saqtaý salasyndaǵy óńirdegi iri joba – Kókshetaý qalasynda 3,7 mlrd teńgege 630 oryndyq óńiraralyq kóp beıindi aýrýhana salynady.