Aqmola oblysynda 6,9 mlrd teńgelik joba sýdyń joqtyǵynan toqtap qala jazdady
ASTANA. KAZINFORM – Aqmola oblysynyń prokýratýrasy quny 6,9 mlrd teńge bolatyn Burabay Milk JShS sút zaýytyn salyp jatqan ınvestordyń quqyǵyn qorǵady.
Qurylys jumystary júrip jatqan kezde nysanǵa sý berý toqtatylǵan. Saldarynan qurylysqa kedergi kelip, ınvestıtsııalyq jobanyń toqtap qalý qaýpi týyndaǵan.
Osyǵan baılanysty ınvestor máseleni sheshýge kómek surap júgingen. Jaǵdaı Aqmola oblysy prokýratýrasynyń baqylaýyna alynyp, jumys Bas prokýratýranyń Investorlardyń quqyqtaryn qorǵaý komıtetiniń úılestirýimen júrgizilgen.
– Prokýratýra jaýapty uıymdarmen tıisti jumystar júrgizdi. Nátıjesinde nysanǵa sý berý sol kúni qalpyna keltirilip, ınvestor qurylys jumystaryn jalǵastyrýǵa múmkindik aldy, – delingen prokýratýra habarlamasynda.
Burabay Milk jobasy jylyna 9 myń tonnadan astam sút ónimin óndiretin zamanaýı zaýyt salýdy kózdeıdi.
Kásiporyn jobalyq qýatyna shyqqannan keıin jańa jumys oryndary ashylyp, bıýdjetke jyl saıyn shamamen 942 mln teńge salyq túsedi dep kútilip otyr.
Zaýytty 2026 jyly iske qosý josparlanǵan.
Qazirgi ýaqytta joba Aqmola oblysy prokýratýrasynyń súıemeldeýinde. Bul jumys jobanyń iske asyrylýyna kedergi keltirýi jáne kásiporyndy iske qosý merzimine áser etýi múmkin máselelerdi der kezinde anyqtap, sheshýge baǵyttalǵan.
Aıta keteıik, Fufeng Group eldiń aýyl sharýashylyǵyna ınvestıtsııa salmaq.
