Aqmola oblysynda 640 keli balyq aýlaǵan brakonerler sottaldy

KÓKShETAÝ. KAZINFORM – «Býrabaı» ulttyq tabıǵı parkiniń quramyna kiretin Jókeı kólinde zańsyz balyq aýlaǵan brakonerlerge qatysty sot úkimi shyqty.

Bas prokýratýranyń málimetinshe, qylmystyq is QR Qylmystyq kodeksiniń 335-baby 4-bóliginiń 1) tarmaǵy boıynsha tergelgen. Tergeý barysynda 2024 jyldyń qyrkúıek aıynda úsh azamattyń aldyn ala sóz baılasý arqyly túngi ýaqytta úrlemeli qaıyqtardy paıdalanyp, kólden jabyndy tormen 640 kılogramnan astam balyqty zańsyz aýlaǵany anyqtalǵan.

Atalǵan áreketterdiń saldarynan memleketke keltirilgen zalal 9 mln teńgeden asqan.

- Aýdan prokýrory qylmystyq isti Aqmola oblysynyń qylmystyq ister jónindegi mamandandyrylǵan aýdanaralyq sotyna joldap, sot protsesinde memlekettik aıyptaýdy qoldady. Sot pen alqabıler alqasy aldynda aıyptalýshylardyń kinási tolyq dáleldendi.

2025 jylǵy 1 jeltoqsanda shyǵarylǵan sot úkimimen úsh azamat kináli dep tanylyp, balyq aýlaý kásibimen aınalysý quqyǵynan 5 jyl merzimge aıyrylyp, 4 jylǵa bas bostandyǵynan aıyrý jazasyna kesildi, - delingen aqparatta.

Prokýratýra ekologııalyq quqyq buzýshylyqtar úshin zańda kózdelgen jaýapkershiliktiń bultartpas ekenin eske salyp, azamattardy balyq aýlaý erejelerin saqtaýǵa jáne sý bıologııalyq resýrstaryn qorǵaýǵa jaýapkershilikpen qaraýǵa, ásirese erekshe qorǵalatyn tabıǵı aýmaqtarda zań talaptaryn qatań oryndaýǵa shaqyrdy.

Aıta keteıik, brakonerlikke qarsy is-sharada 93 qylmystyq is qozǵalyp, 39 mln teńgeden astam aıyppul salyndy.