Aqmola oblysynda 600 mln teńgelik jobaǵa kedergi keltirgen aýyl ákimi jaýapqa tartyldy
ASTANA. KAZINFORM — Aqmola oblysy Bırjan sal aýdanynyń prokýratýrasy bordaqylaý alańyn salý jobasyn iske asyryp jatqan «Zere Agro Holding» JShS-nyń quqyǵyn qorǵady.
Quny 600 mln teńge bolatyn ınvestıtsııalyq joba 10 jańa jumys ornyn qurýdy kózdeıdi. Jobany iske asyrý barysynda ınvestor jer ýchaskesin alý kezeńinde kedergige tap bolǵan.
Prokýrorlyq súıemeldeý barysynda jer ýchaskesin berý jónindegi konkýrs ótkizý kezinde Úlgi aýyldyq okrýginiń ákimi qatysýshylardyń birine memlekettik tirkeý esebindegi derekterge sáıkes kelmeıtin turǵylyqty jeri týraly anyqtama bergeni anyqtaldy.
Osy anyqtama negizinde jer komıssııasy atalǵan qatysýshyǵa negizsiz qosymsha ball eseptegen. Bul konkýrs nátıjesine áser etip, ınvestordyń quqyqtarynyń buzylýyna ákelgen.
Aýdan prokýratýrasy tıisti sharalar qabyldady. Úlgi aýyldyq okrýginiń ákimi Qazaqstan Respýblıkasy ÁQBtK-niń 173-babynyń 1-bóligi boıynsha kásipkerlik qyzmetke zańsyz aralasqany úshin ákimshilik jaýaptylyqqa tartyldy.
Sonymen qatar isti qaraý nátıjesinde sot konkýrs qorytyndysyn joıdy.
Qazirgi ýaqytta ınvestıtsııalyq jobany iske asyrý úshin «Zere Agro Holding» JShS-ǵa jer ýchaskesin berý máselesi aýdan prokýratýrasynyń baqylaýynda.
Aıta ketelik prokýratýra Kókshetaýda zańsyz berilgen 2,4 gektar jerdi qaıtarǵan edi.
