Aqmola oblysynda 60 adam jylytý pýnktterine ornalastyryldy

ASTANA. KAZINFORM — Aqmola oblysynda aýa raıynyń qolaısyzdyǵyna baılanysty jolda qalǵan avtokólikterden adamdardy evakýatsııalaý jumystary jalǵasyp jatyr, dep habarlaıdy Kazinform agenttiginiń tilshisi.

Oblystyq Tótenshe jaǵdaılar departamentiniń baspasóz qyzmeti habarlaǵandaı, óńirde óte kúrdeli meteorologııalyq jaǵdaı qalyptasqan.

— Oblystyń kóptegen aýmaǵynda qutqarýshylar jergilikti atqarýshy organdar men polıtsııamen birlesip apatty-qutqarý jumystaryn júrgizip jatyr. Ártúrli respýblıkalyq mańyzy bar avtojoldardan adamdar evakýatsııalanyp jatyr. Saǵat 22:00 jaǵdaı boıynsha qaza bolǵandar men zardap shekkender joq. Evakýatsııalyq pýnktterge 60 adam ornalastyryldy, — dedi Aqmola oblysy TJD resmı ókili Ersaıyn Qoıshybaev.

Sonymen qatar, Bulandy aýdanynyń qutqarýshylary malyn baǵýǵa shyqqan, biraq qaıtyp oralmaǵan adamdy taýyp aldy. Іzdeý jumystary Makınsk qalasynan 16 km qashyqtyqta júrgizildi. Er adam soltústik-batys ónerkásiptik aımaqtaǵy kópir astynan tabyldy. Ol medıtsınalyq kómekke muqtaj bolmady.

Stepnogorsk qalasynda qutqarýshylar qar qursaýynda qalǵan traktordaǵy adamdardy evakýatsııalady.

Qutqarýshylar oblys turǵyndary men qonaqtaryna qaýipsizdik erejelerin saqtaýdy, múmkindiginshe uzaq saparlarǵa shyqpaýǵa, avtojoldardyń jabylýy týraly aqparatqa nazar aýdarýǵa jáne aýa raıy nasharlaǵan jaǵdaıda eldi mekennen tys shyqpaýǵa shaqyrdy.

Budan buryn habarlanǵandaı, Qaraǵandy — Astana tasjolynda polıtseıler boran kezinde 3,5 myńnan asa kólikti alyp júrdi.