Aqmola oblysynda 6 jasar bala bes kúnnen beri tabylmaı jatyr
ASTANA. KAZINFORM — Aqmola oblysynda polıtseıler men eriktiler joǵalyp ketken 6 jasar balany izdestirip jatyr, dep habarlaıdy Aqmola oblysy polıtsııa departamentiniń baspasóz qyzmeti.
2025 jyldyń 30 sáýirinde Aqmola oblysy Qorǵaljyn aýdanynyń polıtsııa bólimine jergilikti turǵynnan 2019 jyly týǵan alty jasar uly Qalmyrza Jandáýlettiń joǵalyp ketkeni týraly aryz túsken. Anasynyń aıtýynsha, bala saǵat 19:00 shamasynda úıden shyǵyp, qaıta oralmaǵan.
Aldyn ala málimet boıynsha, bala joǵalǵan kúni adamdar ony Nura ózeniniń mańynan kórgen, sodan keıin onyń qaıda ekeni belgisiz.
Polıtsııaǵa túsken aqparat boıynsha, bala aryqsha kelgen, shashy qara, kózi qońyr. Joǵalyp ketken kezde ústinde qyzǵylt sary tústi kúrte, qara kolgotkı jáne qońyr tústi krossovka bolǵan.
Іzdestirý sharalaryna polıtsııa qyzmetkerleri, tótenshe jaǵdaılar bóliminiń qyzmetkerleri, eriktiler men jergilikti turǵyndar jumyldyrylǵan. Balanyń bolýy múmkin barlyq oryndar, sonyń ishinde ózenniń jaǵalaýy tekserilip jatyr. Polıtsııa qyzmetkerleri barlyq turǵyndy qyraǵy bolyp, Jandáýlettiń júrgen jeri týraly málimet bilgen jaǵdaıda dereý 102 nómirine nemese jaqyn jerdegi polıtsııa bólimshesine habarlasýdy suraıdy.
Aıta ketelik Oralda turǵyn úıdiń jertólesinen órt shyǵyp, 15 bala evakýatsııalanǵan edi.