Aqmola oblysynda 55 kólikti zańsyz rásimdegender sottaldy

ASTANA. KAZINFORM – Qarjylyq monıtorıng agenttiginiń Aqmola oblysy boıynsha departamenti jalǵan tólem jáne esep aıyrysý qujattary qoldanylǵan 55 avtokólikti zańsyz tirkeý faktisi boıynsha qylmystyq isti aıaqtady.

Buǵan deıin tergeý barysynda osy shemanyń uıymdastyrýshysy anyqtalǵan. 2020 jyldyń jeltoqsanynan 2022 jyldyń qańtaryna deıingi kezeńde shetelden ákelingen avtokólikterdi bastapqy tirkeý shemasyn top bolyp uıymdastyrǵany belgili boldy.

- Bul áreketter mindetti tólemder men salyqtardyń tólenbeýine jáne jalǵan qujattardy paıdalanýǵa ákelip, memleketke 400 mıllıon teńgeden astam shyǵyn keltirilgen.

Eki kináli tulǵa qylmystyq jaýapkershilikke tartyldy. Sot sheshimimen sottalǵandar 2,5 jyldan 5 jylǵa deıin bas bostandyǵynan aıyrý jazasyna kesildi, - dep jazdy departamentten.

Sonymen qatar, sottyń sheshimimen sottalǵandardyń múlki — Astana jáne Kókshetaý qalalaryndaǵy jalpy quny 90,5 mıllıon teńgeden astam páterler men Kókshetaý qalasyndaǵy quny 35 mıllıon teńge bolatyn úı tárkilendi.