Aqmola oblysynda 46 adam qar qursaýynda qalyp qoıǵan
ASTANA. KAZINFORM — Aqmola oblysynda TJM qutqarýshylary qar qursaýynan 46 adamdy evakýatsııalady, dep habarlaıdy vedomstvonyń baspasóz qyzmeti.
Aqmola oblysynda qolaısyz aýa raıy saqtalyp tur. Óńirdiń birneshe aýdanynda TJD qyzmetkerleri apattyq-qutqarý jáne izdestirý-qutqarý jumystaryn júrgizdi.
Qorǵaljyn aýdany Úshsart aýylynan 6 shaqyrym jerde qar qursaýynda qalǵan avtokólikterden qutqarýshylar 6 adamdy evakýatsııalady. Evakýatsııalanǵandar jylytý pýnktine ornalastyryldy.
Arshaly aýdanynyń qutqarýshylaryna evakýatsııa jumystaryn eki ret júrgizýge týra keldi. Birinshi jaǵdaıda kómek mektep avtobýsyndaǵy jolaýshylarǵa qajet boldy.
— Qar qursaýynda qalǵan avtobýsta 13 adam, onyń ishinde 6 bala bolǵan. Barlyǵy Birsýat aýylyndaǵy turǵylyqty jerlerine jetkizildi. Ekinshi jaǵdaıda qutqarýshylar Ijevskoe aýylynyń mańynda qar qursaýynda qalǵan jerden 11 adamdy, onyń ishinde 3 balany evakýatsııalady. Barlyǵy jylytý pýnktine ornalastyryldy, — delingen habarlamada.
Tselınograd aýdanynyń qutqarýshylary da eki ret shaqyrtýǵa shyqty. Qar qursaýynan 8 adam, onyń ishinde 1 bala evakýatsııalandy.
Ereımentaý aýdanynda mal izdeýge shyqqan er adam joǵalyp ketken. Іzdestirý-qutqarý jumystaryna bara jatqan qutqarýshylar jolda qar qursaýynda qalǵan avtokólikten 7 adamdy evakýatsııalady. Kóp uzamaı joǵalǵan er adam tabylyp, turǵylyqty jerine jetkizildi. Evakýatsııalanǵan azamattar da jylytý pýnktine jetkizildi.
Buǵan deıin SQO-da qar qursaýynda qalǵan balyqshy aman-esen qutqarylǵanyn jazǵanbyz.
