Aqmola oblysynda 44 jastaǵy áıel alty kúnnen beri tabylmaı jatyr
KÓKShETAÝ. KAZINFORM — Aqmola oblysynda 6 kún buryn joǵalǵan 44 jastaǵy áıelge izdeý salyndy.
Aqmola oblysy PD baspasóz qyzmetiniń málimetinshe, joǵalǵan Gúlnur Ernazarqyzy Dosanovanyń densaýlyǵynda psıhıkalyq aýytqýy bar. Ol 12 maýsym kúni saǵat 13:30 shamasynda úıden shyǵyp, sodan qaıtyp oralmaǵan. Bul týraly Tselınograd aýdanynyń Talapker aýylynda turatyn onyń 59 jastaǵy týǵan ápkesi polıtsııaǵa habarlap aıtty.
Ápkesiniń sózinshe, áıel buryn da úıinen ketip, keıin qaıtyp oralyp júrgen. Sol sebepti, týystary birneshe kún boıy ózderi izdep kórgen, odan nátıje bolmaǵan soń polıtsııaǵa habarlasqan.
Joǵalǵan adamnyń boıy 160-165 sm, dene bitimi aryqsha kelgen. Shashy qara tústi, ıyǵyna túsken. Denesinde erekshe belgileri joq.
Ústine qara tústi shalbar, aq jáne kók jolaqtary bar kók tústi sporttyq kostıým, aq tústi krossovka kıgen.
«Qazirgi ýaqytta joǵalǵan áıeldi izdeýge Tselınograd aýdandyq PB jeke quramy, sondaı-aq jaqyn mańdaǵy polıtsııa bólimderi baǵyttalǵan. Baǵdarlar Astana qalasy men kórshiles oblystardyń PD-na jiberildi. Polıtsııa qyzmetkerlerinen jáne joǵalǵan adamnyń týystarynan arnaıy izdeý toptary quryldy. Olar taksı jáne avtobýs júrgizýshilerinen, sondaı-aq temirjol vokzaly men avtostantsııa qyzmetkerlerinen surastyryp jatyr», — dedi vedomstvodan.
Aıta ketsek, budan buryn 29 jastaǵy aqmolalyq áıelge izdeý salynǵanyn jazǵa edik.
