Aqmola oblysynda 385 mlrd teńgelik jobaǵa kedergi bolǵan másele sheshildi
ASTANA. KAZINFORM — Aqmola oblysynda qytaılyq ınvestor júzege asyryp jatqan quny 385 mlrd teńgelik jobaǵa kedergi bolǵan másele sheshildi. Joba aıasynda 800-ge jýyq jumys ornyn ashý josparlanyp otyr. Bul týraly óńirlik prokýratýra málimdedi.
Aqmola oblysynda qytaılyq Dalian Hesheng Holdings kompanııasy «Azııa Altyn Dan» JShS-men birlesip júzege asyryp jatqan iri ınvestıtsııalyq jobanyń iske asyrylýyna kedergi bolǵan másele sheshildi.
— Jobanyń quny 385 mlrd teńgeni quraıdy. Ony iske asyrý aıasynda shamamen 800 jumys ornyn ashý josparlanǵan, — delingen habarlamada.
Jobany daıyndaý barysynda tazartylǵan aǵyndy sýlardy aǵyzýǵa qatysty tehnıkalyq sheshimderdi kelisý máseleleri týyndaǵan. Olardy sheshý úshin ınvestorǵa birqatar ýákiletti memlekettik organdarmen ózara is-qımyl jasaý qajet boldy.
Aqmola oblysynyń prokýratýrasynyń járdemdesýimen qajetti tehnıkalyq sheshimder kelisildi.
Osylaısha, ınvestıtsııalyq jobanyń odan ári iske asyrylýyna áser etýi múmkin ákimshilik kedergi joıyldy.
Aqmola oblysynyń prokýratýrasy ınvestorlardyń quqyǵyn qorǵaý boıynsha jumysty jalǵastyryp, ınvestıtsııalyq jobalardy iske asyrý barysynda týyndaıtyn kedergilerdi jedel joıýǵa erekshe kóńil bóledi.
Aıta keteıik, buǵan deıin Shymkentte ınvestordyń shottaryn 4 aı boıy buǵattaǵan salyq organyna aıyppul salynǵan bolatyn.
