Aqmola oblysynda 38 jańa medıtsınalyq nysan ashylady
ASTANA. KAZINFORM – Jyl sońyna deıin Aqmola oblysynyń aýyldarynda 38 jańa medıtsınalyq nysan ashylady. Bul – zamanaýı dárigerlik ambýlatorııalar, feldsherlik-akýsherlik pýnktter (FAP) jáne medıtsınalyq pýnktter. «Aýyldyq densaýlyq saqtaýdy jańǵyrtý» ulttyq jobasy aıasynda osy maqsattarǵa bıýdjetten 10 mıllıardqa jýyq teńge bólingen. Barlyq nysan qajetti medıtsına mamandarymen, dárigerlermen jáne sanıtarlyq kólikpen qamtamasyz etiledi. Nátıjesinde 43 myńnan astam aýyl turǵyny medıtsınalyq qyzmetke qol jetkize alady.
Alǵashqylardyń biri bolyp Egindikól aýdanynyń Baýmanskoe aýylynda jańa feldsherlik-akýsherlik pýnkt ashyldy. Onyń qurylysyna bıýdjetten 246 mıllıon teńge bólingen. FAP kúnine qyryqqa jýyq naýqasty qabyldaı alady. Nysannyń saltanatty ashylý rásimine Aqmola oblysynyń ákiminiń orynbasyry Altynaı Ámirenova qatysty. Ol jańa medıtsınalyq nysandardy salý aýyldyq jerlerde ómir sapasyn jaqsartýǵa úlken úles qosatynyn atap ótti.
«Qazir basqa medıtsınalyq nysandardyń qurylysy jalǵasýda. Olardy jyldyń sońyna deıin kezeń-kezeńimen ashamyz. Barlyq alǵashqy medıtsınalyq-sanıtarlyq pýnkter oblystyń shalǵaı aýyldyq eldi mekenderinde salynýda, bul aýyl turǵyndary úshin medıtsınany qoljetimdi etýge aıtarlyqtaı múmkindik beredi. Sonymen qatar qazirgi tańda 20-dan astam densaýlyq saqtaý nysanyna kúrdeli jóndeý júrgizilýde. Oǵan bıýdjetten shamamen 3 mıllıard teńge bólingen. Bul medıtsınalyq ınfraqurylymnyń tozýyn azaıtyp, medıtsınalyq qyzmetterdiń sapasyn jaqsartýǵa kómektesedi», - dedi óńirbasshysynyń orynbasary.
Baýmanskoe aýylynyń turǵyndary jańa pýnkttiń ashylǵanyna dán rıza. Sebebi, bul medıtsınalyq kómekke qol jetkizýdi aıtarlyqtaı jeńildetti.
«Aýylymyzda feldsherlik-akýsherlik pýnkttiń bolǵany jaqsy, óıtkeni medıtsınalyq kómek kez-kelshen ýaqytta, kez kelgen adamǵa qajet bolyp qalýy múmkin. Alǵashqy medıtsınalyq kómek qoljetimdi bolýy kerek. Bul biz úshin, ásirese, balalar men qart adamdar úshin óte mańyzdy», - dep bólisti Baýmanskoe aýylynyń turǵyny Almagúl Ensebaeva.
Feldsherlik-akýsherlik pýnkt Baýmanskoe jáne Qorjynkól aýyldarynyń 800-ge jýyq turǵynyna qyzmet kórsetedi. Onda ártúrli medıtsınalyq kómek kórsetýge arnalǵan mamandandyrylǵan kabınetter jabdyqtalady. Munda úsh medıtsına qyzmetkeri jumys isteıdi. Sonymen qatar shuǵyl kómek kórsetý úshin aýdandyq aýrýhanadan avtokólik bólinedi.
