Aqmola oblysynda 379 zańsyz qoqys orny joıyldy
ASTANA. KAZINFORM – Aqmola oblysynda sońǵy 2,5 jylda 379 zańsyz qoqys orny joıylyp, 217 myń tonnadan astam qaldyq shyǵaryldy, dep habarlaıdy Kazinform tilshisi.
Aqmola oblystyq Polıtsııa departamentiniń baspasóz qyzmetiniń málimetinshe, 2024 jylǵy sáýirden beri «Taza Qazaqstan» bastamasy aıasynda zańsyz qoqys oryndaryn anyqtaý jáne tabıǵatty qorǵaý zańnamasynyń buzylýyna jol bermeý úshin 189 mobıldi top jumys istep keledi.
– Bastama júzege asyrylǵan ýaqyt ishinde polıtsııa qyzmetkerleri 285 myńnan astam ákimshilik quqyqbuzýshylyqtyń jolyn kesti. 95 zańdy tulǵa jaýapkershilikke tartyldy. Sonymen qatar belgilenbegen oryndarǵa las sý tókken 81 assenızator kóligi arnaıy turaqtarǵa qoıyldy, – dep habarlady polıtsııa.
Polıtsııa qyzmetkerleri turmystyq jáne qurylys qaldyqtaryn zańsyz tógý, sondaı-aq abattandyrý erejelerin buzý derekterin anyqtaýǵa erekshe nazar aýdaryp otyr.
«Taza Qazaqstan» aıasyndaǵy reıdter kún saıyn júrgiziledi. Polıtsııa óńir tazalyǵy memlekettik organdar men kommýnaldyq qyzmetterdiń jumysyna ǵana emes, ár turǵynnyń jaýapkershiligine de baılanysty ekenin eske saldy.
Aıta keteıik, buǵan deıin SQO-da bıyl bes júzge jýyq adam qoqys úshin aıyppul tólegeni habarlandy.
Al Pavlodarda qoqysty zańsyz úıgenderge 4,8 mln teńge aıyppul salyndy.
