Aqmola oblysynda 3,7 mlrd teńge jymqyrǵan alaıaqtar tobynyń isi sotqa joldandy

KÓKShETAÝ. KAZINFORM – Aqmola oblysynyń prokýrorlary áleýmettik turǵydan osal azamattardy urlap, olardyń atyna iri kólemde banktik nesıe rásimdeýmen aınalysqan uıymdasqan qylmystyq topqa qatysty istiń tergeýin aıaqtady.

Tergeý dereginshe, top quramyna elimizdiń túrli óńirlerinen 25 adam kirgen. Olardyń arasynda Qarjy naryǵyn retteý jáne damytý agenttigi ortalyq apparatynyń qyzmetkeri men birneshe banktiń (Kaspi bank, Forte bank, Eýrazııalyq bank, Jusan bank) qyzmetkerleri bolǵan.

Qatysýshylardyń kómegimen alaıaqtyq áreketter 5 jyldan astam ýaqyt boıy jasalyp kelgen.

- Qylmystyń qurbanyna respýblıka boıynsha 348 azamat tap bolyp, keltirilgen shyǵyn kólemi 3,7 mlrd teńgege jetti. Tergeý barysynda zańsyz jolmen tabylǵan páterler, jer telimderi, qymbat avtokólikter men qolma-qol aqsha tárkilendi. Tárkilengen múliktiń jalpy quny 2,7 mlrd teńge boldy, - dep jazdy prokýratýradan

Uıymdasqan toptyń barlyq músheleri ustalyp, ýaqytsha ustaý ızolıatoryna qamaldy. Qylmystyq is qazirgi ýaqytta protsess qatysýshylaryna tanysýǵa berildi, túpkilikti sheshimdi sot shyǵarady.

Aqmola oblysynyń prokýratýrasy azamattardy alaıaqtarǵa senbeýge shaqyrdy.

Aıta keteıik, Aqmola oblysynda kóliktik baqylaý ınspektsııasynyń 11 qyzmetkeri sottaldy.